كێشەی مووچەی هەرێم دەبرێتە كۆبوونەوەی ئەنجومەنی دەوڵەت

PUKMEDIA

دراوی عیراقی

بڕ‌یارە ئەمڕ‌ۆ لەسەر راسپاردەی سەرۆكوەزیرانی عیراق كێشەی مووچەی فەرمانبەران هەرێم ببرێتە كۆبوونەوەی ئەنجومەنی دەوڵەت و ئەوان بڕ‌یاری یەكلاكەرەوەی لەبارەوە بدەن.

ئەمڕ‌ۆ یەك شەممە 14ی ئەیلولی 2025، لەسەر راسپاردەی محەمەد شیاع سودانی، سەرۆكوەزیرانی عیراق ئەنجومەنی دەوڵەت بۆ بڕ‌یاردان لەسەر كێشەو ناكۆكییەكانی نێوان هەردوو حكومەتی هەرێم و فیدڕ‌اڵ پەیوەست بە شێوازی رادەستكردنی داهاتی ناوخۆی هەرێم كۆدەبێتەوە.

كاری ئەنجومەنی دەوڵەتی عیراق بریتییە لەپێداچوونەوە بەبڕ‌یارەكانی حكومەت، كاتێك لەسەر پرسێك گرفت دروستدەبێت و لێكدانەوەی جیاواز بۆ یاساكان دەكرێت ئەنجومەنی دەوڵەت دەقی یاساكان رووندەكاتەوە و گرفتەكان یەكلایی دەكاتەوە.

بەپێی رێككارەكان لەدوای بڕ‌یاردان لەبارەی شێوازی رادەستكردنی داهاتی ناوخۆی هەرێم ئەنجومەنەكە بڕ‌یاری كۆتایی خۆی و روونكردنەوەی پێویست بەیاداشتێك رەوانەی ئەنجومەنی وەزیران دەكاتەوە بۆ بڕ‌یاردانی كۆتایی.

ئەمەش لەدوای ئەوەدێت لە رۆژی 9ی ئەم مانگەدا محەمەد شیاع سودانی لەكۆبوونەوەی ئەنجومەنی وەزیرانی عیراقدا بڕ‌یاریدا كێشەی رێكنەكەوتنی هەرێم و بەغدا لەبارەی رادەستكردنی داهاتی ناوخۆی هەرێم ئاراستەی ئەنجومەنی دەوڵەت بكات.

 PUKMEDIA