كۆبوونەوەكانی هەرێم و ئەمریكا لەبارەی پڕۆسەی چاكسازیی پێشمەرگە بەردەوامن

راگەیاندنی سەرۆكایەتیی هەرێمی كوردستان

كۆبوونەوەی هەرێم و ئەمریكا لەبارەی پڕۆسەی چاكسازیی پێشمەرگە

ئەمڕۆ سێشەممە 16ی 9ی 2025، لە سەرۆكایەتیی هەرێمی كوردستان، گەڕێكی دیكەی كۆبوونەوە هاوبەشەكانی نێوان لێپرسراوانی ژمارەیەك لە دامەزراوە پەیوەندیدارەكانی هەرێمی كوردستان و وەفدێكی سەربازی و دیپلۆماسیی ئەمریكا، بۆ گفتوگۆكردن لەسەر پڕۆسەی چاكسازی و رێكخستنەوەی هێزی پێشمەرگە، بەڕێوە چوو.

لە گفتوگۆكانی كۆبوونەوەكەدا، وێڕای جەختكردنەوە لە گرنگیی سەرخستنی پڕۆسەی چاكسازیی هێزی پێشمەرگە و پێویستیی یەكخستنەوەیان، دوا هەنگاوەكانی پڕۆسەكە و ئەو قۆناغانەی كە ماون، خرانەڕوو. 

هەر لە كۆبوونەوەكەدا، هەوڵ و هەنگاوی هاوبەش بە ئاراستەی خێراكردنی پڕۆسەكە و چارەسەركردنی ئاستەنگەكانی بەردەمی دووپات كرایەوە و بیروڕا سەبارەت بە فراوانكردنی هەماهەنگی و هاریكاری لە نێوان هەردوولادا، ئاڵوگۆڕ كرا.

PUKMEDIA