پەرلەمانتارێکی یەکێتی داوای دامەزراندنی سێ یەکەمەکان و دەرچووانی کۆلێژە پزیشکییەکان دەکات

PUKMEDIA

بەدرییە حسێن ئەندامی ئەنجوومەنی نوێنەرانی عیراق

ئەندامێکى فراکسیۆنى یەکێتى لە ئەنجوومەنى نوێنەران داواى دامەزراندنى سێ یەکەمەکانى هەرێمى کوردستان و هاوکات داواى دامەزراندنى دەرچووى کۆلێژە پزیشکییەکان و داواى دانپێدانان بە زانکۆى گەرمیان دەکات و سەبارەت بە داواکارییەکانیشى پەرلەمانتارەکەى یەکێتى بۆ PUKMEDIA   وتى: داوام لە وەزیرى خوێندنى باڵاى فیدڕاڵ کردووە، لە ناوچە جێناکۆکەکانیش بۆ خوێندکارانى پزیشکى سیستمى پەڕینەوە جێبەجێ بکرێت و کارئاسانی بۆ خوێندکاران بکات.

بەدریە حسێن ئەندامى فراکسیۆنى یەکێتیى نیشتمانیى کوردستان، هاوکات ئەندامى لیژنەى خوێندنى باڵا و پەروەردە لە ئەنجوومەنى نوێنەرانى عیراق، بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند: لە چوارچێوەى هەوڵەکانمدا نوسراوێکم بۆ دامەزراندنى سێ یەکەمەکانى ساڵى 2023 بۆ وەزیرى دارایى کردووە، کە وەزارەتى خوێندنى باڵاى حکومەتى هەرێمى کوردستان ناوەکانى بۆ وەزارەتى دارایى ناردووە و وەزارەتى خوێندنى باڵاى فیدراڵیش ناوەکانیان بۆ وەزارەتى دارایى ناردووە و ئەمڕۆش من نوسراوێکم بۆ ئەو مەبەستە بۆ وەزیرى دارایى کردووە.

ئاماژەی بەوەشدا: هاوکات ئەمڕۆ نوسراوێکى دیکەم بۆ وەزیرى تەندروستى حکومەتى فیدراڵ کردووە، بەمەبەستى دامەزراندنى خوێندکارانى دەرچووى کۆلێژى پەرستارى زانکۆى سلێمانى ساڵى 2015 – 2016 کە هەتا ئێستا بێبەش کراون لەو مافەیان.  

بەدریە حسێن ئەوەشیخستەڕوو: هەر ئەمڕۆ نوسراوێکى دیکەم بۆ وەزیرى خوێندنى باڵاى حکومەتى فیدراڵ کردووە، سەبارەت بە دانپێدانان بە زانکۆى گەرمیان، کە زانکۆیەکى حکومیە و نزیکەى 24 هەزار خوێندکار تێیدا دەخوێنێت و هەموو مەرجە یاساییەکانى تەواو کردووە و هیچ گرفتێکى یاسایى لەبەردەم دانپێدانانیدا نەماوە.

هاوکات بەدریە حسێن ئەندامى فراکسیۆنى یەکێتیى نیشتمانیى کوردستان ئەوەشى راگەیاند: لە ناوچە جێناکۆکەکان بڕیارێکی خوێندنى باڵا هەیە، کە سیستمى پەڕینەوە بۆ خوێندکارانى قۆناغى پێش کۆتایى کە لە کۆلێژە پزیشکییەکانى پزیشکى گشتى و دەرمانسازى و پزیشکى ددان دەخوێنن جێبەجێ ناکرێت، ئەمەش بۆتە گرفتێک بۆ ئەو خوێندکارانەى کە لە تاقیکردنەوەکاندا لە تەواوى وانەکانیاندا نمرەى دەرچوون بەدەستناهێنن و منیش ئەمڕۆ بە نوسراوێک داوام لە وەزیرى خوێندنى باڵا کردووە، کارئاسانی بۆ خوێندکاران بکات و بۆ ئەوانیش ئەو سیستمە جێبەجێ بکرێت.


PUKMEDIA