سودانی: بەشداری نەكردن لە هەڵبژاردن هیچ پرسێك چارەسەر ناكات

نوسینگەی رۆژنامەوانی سەرۆکوەزیرانی عیراق

محەمەد شیاع سودانی سەرۆک وەزیرانی عیراق

سەرۆكوەزیرانی عیراق رایدەگەیەنێت: بەشداری نەكردن لە هەڵبژاردن هیچ پرسێك چارەسەر ناكات، بەپێچەوانەوە بە بەشداریكردنی هاووڵاتیان لە پڕۆسەی دەنگدان، وڵات بەرەو ئاسایش و سەقامگیری و گەشەسەندن دەچێت.

محەمەد شیاع سودانی سەرۆكوەزیرانی عیراق رایگەیاند: بەشداریكردنی هەمووان لە هەڵبژاردنی داهاتووی ئەنجومەنی نوێنەرانی عیراقدا گرنگە، چونكە بەشدارینەكردن لە هەڵبژاردن چارەسەری هیچ پرسێك ناكات، بەپێچەوانەوە دەبێتە دەستكەوت بۆ گەندەڵكاران.

سەرۆكوەزیرانی عیراق راشیگەیاند: هاووڵاتیان بە بەشداریكردن لە هەڵبژاردن و پڕۆسەی دەنگدان، نیوەی ئەو رێگەیە دەبڕن كە بەرەو ئاسایش و سەقامگیری و گەشەسەندن دەچێت.

ئەوەشی خستووەتەڕوو: ئێستا جیهان چاوی لەسەر عیراقە كە وڵاتێكی پارێزراو و گەشەسەندووە، بەو هۆیەشەوە چەندین كۆمپانیای گەورەی جیهان وەبەرهێنانیان هێناوەتە عیراق و گۆڕانكاریی گەورەی ئابوریش لە وڵاتدا بەدیهێنراوە.

ئەمەش لە كاتێكدایە، ئەنجوومەنی وەزیرانی عیراق، رۆژی 9ی4ی2025 لە كۆبوونەوەی ئاسایی خۆیدا، رۆژی 11ی11ی2025ی وەك رۆژی ئەنجامدانی هەڵبژاردنی ئەنجومەنی نوێنەران دیاریكرد، لەبەرئەوە ناوی لیست و قەوارەکان پێشکەش بە کۆمسیۆن کراوە و چاوەڕوانی کۆتایی رێکارەکانن، تاوەکو دەست بە بانگەشە بکەن.

PUKMEDIA