ئه‌نجومه‌نی وه‌زیران مووچه‌ و داهاتی نانه‌وتی و هه‌نارده‌ی نه‌وتی هه‌رێم تاوتوێده‌كات

ئەرشیف

کۆبوونەوەی ئەنجومەنی وەزیرانی عیراق

بڕ‌یاره‌ ئه‌مڕ‌ۆ 23ی9ی2025 ئه‌نجوومه‌نی وه‌زیرانی عیراق بۆ تاوتویكردنی چه‌ند پرسێك كۆبوونه‌وه‌ی ئاسایی خۆی ئه‌نجامبدات، ئه‌وه‌ی په‌یوه‌ندی به‌هه‌رێمی كوردستانه‌وه‌ هه‌بێت، خۆی له‌پرسی مووچه‌ی مووچه‌خۆران و هه‌نارده‌ی نه‌وت و داهاتی نانه‌وتی هه‌رێمی كوردستان ده‌بینێته‌وه‌.

دوای چه‌ند مانگێك له‌ناكۆكی و گرژی، به‌غدا و هه‌ولێر له‌گه‌ڵ كۆمپانیا بیانییه‌كان گه‌یشتنه‌ رێككه‌وتن بۆ ده‌ستپێكردنه‌وه‌ی هه‌نارده‌كردنی نه‌وتی هه‌رێم له‌ڕ‌ێگه‌ی به‌نده‌ری جه‌یهانی توركیاوه‌ و دوێنێ 22ی9ی2025 ئه‌و رێككه‌وتنه‌ ئیمزا كرا، كه‌ به‌پێی رێككه‌وتنه‌كه‌ پێویسته‌ كۆمپانیا بیانییه‌كان له‌بری پێدانی پاره‌ی كاش بڕی نه‌وت ده‌درێت به‌كۆمپانیاكان.

هاوكات شاره‌زایان پێشبینی ده‌كه‌ن هه‌نارده‌كردن له‌ڕ‌ێگه‌ی به‌نده‌ری جه‌یهانه‌وه‌ به‌ توانای سه‌ره‌تایی نزیكه‌ی 100 هه‌زار به‌رمیل له‌ڕ‌ۆژێكدا ده‌ستپێبكات، ورده‌ ورده‌ بۆ 280 هه‌زار به‌رمیل له‌ڕ‌ۆژێكدا زیاد بكات دوای ته‌واوبوونی ئاماده‌كاری و لێكتێگه‌یشتنه‌ ته‌كنیكی و لۆجستییه‌كان له‌گه‌ڵ توركیا، ئه‌مه‌ش گرنگی ستراتیژی به‌نده‌ره‌كه‌ ده‌گه‌ڕ‌ێنێته‌وه‌.

به‌پێی رێككه‌وتنه‌كه‌ هه‌رێم پابه‌نده‌ به‌ به‌رهه‌مهێنانی 280 هه‌زار به‌رمیل نه‌وت له‌ڕ‌ۆژێكدا، له‌و ڕ‌ێژه‌یه‌ش 50 هه‌زار به‌رمیل بۆ به‌كارهێنانی ناوخۆ ته‌رخان ده‌كرێت، هاوكات ئه‌و نه‌وته‌ی ده‌مێنێته‌وه‌ رۆژانه‌ راده‌ستی كۆمپانیای سۆمۆ ده‌كرێت، كه‌ ئه‌ركی هه‌نارده‌ و به‌بازاڕ‌كردنی له‌ ئه‌ستۆدایه‌.

هاوكات بڕیاره‌ له‌كۆبوونه‌وه‌ی ئه‌مڕۆی ئه‌نجومه‌نی وه‌زیراندا پێشنیاری ئه‌نجومه‌نی ده‌وڵه‌تیش له‌باره‌ی پرسی داهاته‌ نانه‌وتییه‌كانی هه‌رێمی كوردستان بخرێته‌ به‌رباس و گفتوگۆ، هه‌روه‌ها دوای یه‌كلاكردنه‌وه‌ی ئه‌و دووپرسه‌، پرسی سێهه‌م كه‌ تایبه‌ته‌ به‌ مووچه‌ی مووچه‌خۆرانی هه‌رێمی كوردستان تاوتوێده‌كرێت، له‌سه‌ر ئه‌و پرسه‌ش د.نه‌رمین مه‌عروف ئه‌ندامی لیژنه‌ی دارایی له‌ئه‌نجومه‌نی نوێنه‌رانی عیراق تایبه‌ت به‌ PUKMEDIA ی راگه‌یاند: له‌ئه‌گه‌ری په‌سه‌ندكردنی پرسی هه‌نارده‌ی نه‌وت و داهاته‌ نانه‌وتییه‌كان، بێگومان پرسی مووچه‌ش چاره‌سه‌ر ده‌بێت.

PUKMEDIA