بۆ هەڵبژاردنی كەركوك 179 كاندیدی پیاو و 73 كاندیدی ژن تۆماركراون

PUKMEDIA

هەڵبژاردن

لە كەركوك 252 كاندید ركابەری لە سەر 12 كورسی پارێزگاكە دەكەن و كۆمسیۆنیش رایدەگەیەنێت: لە ملیۆنێك و 229 هەزار كەس، 897 هەزار كەسیان خاوەنی كارتی بایۆمەترین.
 
عەلی عەباس، لێپرسراوی راگەیاندنی كەركوكی كۆمسیۆنی باڵای سەربەخۆی هەڵبژاردنەكانی عیراق، لە لێدوانێكی رۆژنامەوانیدا رایگەیاند: ژمارەی كاندیدەكان لە پارێزگای كەركوك بۆ هەڵبژاردنی داهاتووی ئەنجومەنی نوێنەرانی عیراق گەیشتووەتە 252 كاندید، لەو رێژەیەش 179 كاندیدیان پیاون و 73 كاندیدیان ژنن و سەرجەمیان ركابەری لە سەر 12 كورسی پارێزگاكە دەكەن.

راشیگەیاندووە: لە كەركوك پێنج هاوپەیمانی سیاسی، نۆ پارت و حەوت كاندیدی سەربەخۆ بەشداری هەڵبژاردنی داهاتوی ئەنجومەنی نوێنەراندا دەكەن.

 لێپرسراوی راگەیاندنی كەركوكی كۆمسیۆن ئەوەشدەخاتەڕوو: لە ملیۆنێك و 229 هەزار كەس، 897 هەزار كەسیان داتاكانیان نوێ كردووەتەوە و خاوەنی كارتی بایۆمەترین.

ئەمەش لە كاتێكدایە، ئەنجوومەنی وەزیرانی عیراق، رۆژی 9ی4ی2025 لە كۆبوونەوەی ئاسایی خۆیدا، رۆژی 11ی11ی2025ی وەك رۆژی ئەنجامدانی هەڵبژاردنی ئەنجومەنی نوێنەران دیاریكرد، لەبەرئەوە ناوی لیست و قەوارەکان پێشکەش بە کۆمسیۆن کراوە و چاوەڕوانی کۆتایی رێکارەکانن، تاوەکو دەست بە بانگەشە بکەن.

PUKMEDIA