گۆڵبژێرێک لە نووسینەکانی عیماد ئەحمەد بڵاودەکرێتەوە

کوردستانی نوێ

گۆڵبژێرێک لە نووسینەکانی عیماد ئەحمەد

ئەمڕۆ 27ی9ی2025، گۆڵبژێرێک لە نووسینەکانی عیماد ئەحمەد، کە پێنج کتێب بەهەردوو زمانی کوردی و عەرەبی لە خۆدەگرێت، لەمەراسیمێکدا رێوڕەسمی بڵاوکردنەوە و ناساندنی بۆ کرا.

لەمەراسیمەکەدا عیماد ئەحمەد ئەندامى مەکتەبى سیاسی و لێپرسراوی مەكتەبی راگەیاندن و هۆشیاری وتارێکی پێشکەشکرد و رایگەیاند: سەرەتای نوسینم دەگەڕێتەوە بۆ سەردەمی قۆناغی خوێندنم لەساڵی 1973، دواتر بەردەوام بووم و چالاکی جۆراوجۆرم هەبوو لەخوێندنگە، دواتر لەشاخیش هەر بەردەوام بووم و دەستم کرد بە نووسین بە زمانی عەرەبی و سەرەتا بە بابەتی ئاسان دەستمپێکرد، تا گەیشتە ئەوەی هەلسەنگاندنی شۆڕش و رەخنەش بنوسم.

راشیگەیاند: سوپاسی سەرجەم ئەو کەس و لایەنانە دەکەم، کە لەسەرەتای دەستپێکردنم تا ئێستا هاوکارمبوون و بەردەوام هانیان داوم بۆ نوسین و کۆکردنەوەی نووسینەکانیشم.    


گۆڵبژێرێک لە نووسینەکانی عیماد ئەحمەد، کۆمەڵێک تەوەر و بابەت لەخۆدەگرن بەشێکیان گێڕانەوەی یادگارییەکانی سەردەمی لاوی و کاروانی تێکۆشان و پێشمەرگایەتیە و بەشێکی تریشیان تێڕوانین و هەڵسەنگاندنی نووسەرە بۆ دۆخی کوردستان و هەلومەرجی شۆڕش و خەوش و نادادییەکانی حوکمڕانیی بەعس.

ئەم کتێبانە، لە دوو توێی بۆکسێدا چاپ و ئامادەکراون و بەشێک لەمێژووی جوڵانەوەی شۆڕشی چەکداری و سیاسی و ئەزمونی حوکمڕانیی کوردستان دەگێڕنەوەو وێنای چەند قۆناغێکی هەستیاری گەلەکەمان دەکات، بەشێکیش لەو دیدو بۆچوونە سیاسی و فیکریانەش دەخەنەڕوو کە لەچەند سەردەمێکی جیادا جێی مشتومڕو گفتوگۆ بوون.

PUKMEDIA