پێشانگای وێنەکانی سەرۆک مام جەلال کرایەوە

PUKMEDIA

كردنەوەی پێشانگای وێنەكانی سەرۆك مام جەلال

ئەمڕۆ 1ی10ی2025، بۆردی راگەیاندنی یەكێتیی نیشتمانیی كوردستان لە یادی كۆچی دوایی سەركردە و رابەری گەلەکەمان مام جەلال پێشانگایەكی تایبەتی بە بەشێك لە فۆتۆكانی سەرۆك مام جەلال کردەوە.

پێشانگەکە بە ئامادەبوونی لەتیف نێروەیی لێپرسراوی بۆردی راگەیاندنی یەكێتیی نیشتمانیی كوردستان و ئەندامانی مەکتەب وئەندامانی بۆردی راگەیاندن و دۆست و هەڤاڵان کرایەوە، کە تیایدا بەشێک لەو وێنانە نمایش کران کە تایبەتن بە قۆناغە جیاجیاکانی خەباتی سیاسی و رزگاریخوازی گەلەکەمان، کە لە هەڕەتی لاوییەوە دەستیپێکردووە.

لە بارەی کردنەوەی پێشانگاکە، لەتیف نێروەیی لێپرسراوی بۆردی راگەیاندنی یەكێتیی نیشتمانیی كوردستان رایگەیاند: ئەمڕۆ وەک ئەرکێکی بچووک لەسەر شانی ئێمە، هەستاین بە خستنەڕووی کۆمەڵێک وێنەی سەرۆک مام جەلال لە وێستگە و قۆناغە جیاوازەکاندا.

ئاماژەی بەوەشکرد: هەر وێنەیەک بۆ خۆی مێژووییەک و رووداوێکە، هەروەها کەرەستەیەکە بۆ ئەوەی نەوەی ئەم وڵاتە لە داهاتوودا لەسەر ئەم وێنانە بتوانن توێژینەوەی لەسەر بکەن.

لێپرسراوی بۆردی راگەیاندنی یەكێتیی نیشتمانیی كوردستان  روونیشی کردەوە: ئێمە وەک سەرۆک مام جەلال یان هەڤاڵ مام جەلال بینیومانە، بەڵام لەم پێشانگەیەدا وێنەی مام جەلالی باوک دەبینین، واتە بەشێک لە وێنەکان وێنەی خێزانین، کە سەیر دەکەین وەک چۆن هەڤاڵێکی میهرەبان بوو، بەهەمان شێوە باوکێکی میهرەبانیش بوو.

لە کۆتایشدا، لەتیف نێروەیی لێپرسراوی بۆردی راگەیاندنی یەكێتیی نیشتمانیی كوردستان رایگەیاند: سەرۆک مام جەلال سەرباری ئەوەی رۆژنامەنوس و نوسەرێکی دەستڕەنگین بوو کە بەسێ زمان وتاری دەنوسی، بەهەمان شێوە میدیا دۆست و قەڵەمدۆستیش بوو، پشتگیری لە میدیای ئازاد دەکرد وبڕوای تەواوی بە ئازادی رادەربڕین هەبوو،ئێمەش خوێندکارێکن لەو خوێندنگا گەورەیەی کە هەڤاڵ مام جەلال مامۆستای بوو.

PUKMEDIA