كۆنفرانسی زانستیی نێودەوڵەتیی سەرۆك جەلال تاڵەبانی بەڕێوەدەچێت

PUKMEDIA

كۆنفرانسی زانستیی نێودەوڵەتیی سەرۆك جەلال تاڵەبانی بەرێوەدەچێت

بەبۆنەی تێپەڕبوونی هەشت ساڵ بەسەر ماڵئاوایی سەركردە و رابەری گەلەكەمان سەرۆك مام جەلال، زانكۆی سلێمانی بەهاوبەشی دامەزراوەی سەرۆك جەلال تاڵەبانی، كۆنفرانسی زانستیی نێودەوڵەتیی سەرۆك جەلال تاڵەبانی، رێكدەخات.

لە یەكەم رۆژی كۆنفرانسەكەدا، پاشنیوەڕۆی رۆژی 3ی تشرینی یەكەمی 2025، مەراسیمێكی تایبەت لە هۆڵی كۆنگرێس لە سەرۆكایەتی زانكۆی سلێمانی بەڕێوەدەچێت و رۆژی 4ی تشرینی یەكەمی 2025، لە دووەم ڕۆژی كۆنفرانسی زانستیی نێودەوڵەتیی (سەرۆك جەلال تاڵەبانی) چەند پانێڵێك پێشكەشدەكرێن.

لە كۆنفرانسەكەدا (20) توێژینەوەی زانستی لەسەر هزری سیاسیی سەرۆك مام جەلال و رۆڵ و كاریگەری لە پرۆسەی ئاشتی و ئازادی رادەربڕین و مافی مرۆڤ و چەسپاندنی پرۆسەی دیموكراسی لە عێراقی دوای ساڵی 2003، هەروەها رۆڵ و كاریگەری سەرۆك مام جەلال لەسەر پەیوەندی چین و كوردستان و عێراق و هەوڵەكانیان بۆ سەقامگیری و پێكەوەژیان و پاراستنی مافی پێكهاتەكان لە شاری كەركوك پێشكەشدەكرێن.

جێی باسە، هەر بەبۆنەی ژیانئاوایی (سەرۆك مام جەلال) رۆژی 3ی تشرینی یەكەمی 2025، بە بەشداری خانەی پەرتوك و كتێبخانەی زانكۆی سلێمانی، حەوتەمین خولی پێشانگەی نێودەوڵەتی كتێب لە سلێمانی بەناوی (خولی سەرۆك تاڵەبانی) دەكرێتەوە.

PUKMEDIA