یاسای لێبوردنی گشتی زیاتر لە نۆ هەزار کەس ئازاددەکات

PUKMEDIA

لۆگۆی وەزارەتی داد

وەزارەتی دادی عیراق لە دوای جێبەجێکردنی یاسای لێبوردنی گشتی لە بەغدا و پارێزگاکانی دیکەی عیراق ئازادکردنی نۆ هەزار و 410 زیندانی رادەگەیەنێت.

وەزارەتەکە لە بەیاننامەیەکدا کە کۆپییەکی دەست PUKMEDIA کەوتوە، ئاماژەی بەوە کردووە: "ژمارەی ئەو زیندانیانەی کە بە یاسای لێبوردنی گشتی ئازادکراون و دەیانگرێتەوە لە دوای جێبەجێکردنیەوە گەیشتووەتە 9 هەزار و 410 زیندانی لە بەغدا و سەرجەم پارێزگاکانی عیراق، ئەمەش لە چوارچێوەی هەوڵەکان بۆ جێبەجێکردنی یاساکە و بەدیهێنانی دادپەروەری".

ئاماژەی بەوەشکردووە: "ئەم رێوشوێنە لە جێبەجێکردنی رێنماییەکانی خالد شوانی وەزیری داد دێت، بۆ ئاسانکاری و خێراکردنی رێکارەکانی جێبەجێکردنی یاسای لێبوردنی گشتی، دوای تەواوکردنی سەرجەم مەرجە یاساییە پێویستەکان و دەرکردنی بڕیاری کۆتایی دادوەری".

لە بەیاننامەکەدا ئەوەش هاتووە: "پرۆسەی ئازادکردنەکە دەرئەنجامی ئەو هەوڵە ناوازەیەیە کە لەلایەن دەزگای چاکسازیی عیراقی و لیژنە یاساییە پەیوەندیدارەکانەوە ئەنجامدراون، بە هەماهەنگی راستەوخۆ لەگەڵ ئەنجومەنی باڵای دادوەری، بۆ دڵنیابوون لە جێبەجێکردنی وردی بڕیارە دادوەرییەکان، بەپێی بڕگەکانی یاسای لێبوردنی گشتی، کە لەلایەن دادگا پەیوەندیدارەوە دەردەچن".

PUKMEDIA