سێ تۆمەتبار لەسەر رووداوەکەی نەخۆشخانەی شار دەستگیرکران

راگەیاندنی پۆلیسی سلێمانی

سێ تۆمەتبارەکە

بەڕێوەبەرایەتی پۆلیسی پارێزگای سلێمانی دەستگیرکردنی سێ‌ تۆمەتباری لەسەر رووداوەكەی شەوی رابردووی نەخۆشخانەی شار لەلایەن مەفرەزەکانی بەشی پۆلیسی فریاکەوتن و بنکەی پۆلیسی نەخۆشخانەوە راگەیاند.

بەرێوەبەرایەتی پۆلیسی پارێزگای سلێمانی لە راگەیەندراوێکدا کە کۆپییەکی دەست PUKMEDIA کەوتوە رایگەیاند: شەوی ڕابردوو پاش سەعات 12ی نیوەی شەو سێ‌ كەس بەمەبەستی سەردانیکردن دەچنە نەخۆشخانەی شار، بەهۆكاری ئەوەی سەردانیكردن بەپێی یاسا و رێنماییە بەركارەكان لەو کاتەدا رێگە پێدراو نییە، کارمەندی پاسەوانی بنکەی پۆلیسی نەخۆشخانە رێکاری گونجاو دەگرێتە بەرو رێگرییان لێدەكات، لەگەڵ ئەوەدا کە دەستگیرکراوان یەکێکیان دور لەڕاستی خۆی بە پزیشکی نەخۆشخانە دەناسێنێت و یەکێکیشیان لەژێر کاریگەری مەی نۆشیدایە، گرژی و ئاڵۆزی دەخوڵقێنن و هێرش دەكەنە سەر کارمەندەکەمان و یەكێكیان چەكی كارمەندەکە دەڕفێنێت و تەقە دەكات و هەڵدێت.


ئەوەش هاتووە: دەستبەجێ‌ لەلایەن بنکەی پۆلیسی نەخۆشخانەوە دووان لەتۆمەتبارەكان دەستگیرکران و لەماوەیەكی زۆر كەمیشدا تۆمەتباری سێیەم لە لایەن مەفرەزەكانی بەشی پۆلیسی فریاكەوتنی بەڕێوەبەرایەتیمانەوە لە گەڕەكی كوردسات دەستگیركرا.

لە ئێستادا هەریەك لەتۆمەتباران :
س ، س لەدایكبووی 1969
ب ، س ، س لە دایكبووی 2006
ب، س، س لەدایكبووی 2004 
بەبڕیاری دادوەر بەپێی ماددەی (31/405) لەیاسای سزاکانی عیراقی راگیراون و لێكۆڵینەوە لەگەڵیان بەردەوامە .

PUKMEDIA