لە یۆبێلی زێڕینی راگەیاندنی یەكێتیی نیشتمانیی كوردستاندا

PUKMEDIA

لۆگۆی میدیاكانی یەكێتی

دامەزراندنی یەكێتیی نیشتمانیی كوردستان لە 1ی 6ی 1975دا چەندە زەرورەتی مێژوویی قۆناغی هەڵسانەوەی دوای ئاشبەتاڵ بوو، هێندەش هەڵگیرساندنی شۆڕشێكی میدیایی بۆ پێناسەكردنی دیدگا و ئامانجی ئەو رێكخراوە لەسەر ئاستی كوردستان و عیراق و ناوچەكە گرنگ بوو بەر لە هەڵگیرساندنی شۆڕشی چەكداری و هەر ئەو زەرورەتەش بووە هاندەری ئەوەی ی.ن.ك لە رۆژی 1ی 11ی 1975دا یەكەم ژمارەی بڵاوكراوەی (الشرارە) بە زمانی عەرەبی و پاش ماوەیەكیش (رێبازی نوێ) بە زمانی كوردی دەربكات.

بەو پێیەی زۆربەی ئەندامانی دەستەی دامەزرێنەر، قاڵبووی بواری رۆژنامەنووسی بوون و لەگرنگیی رۆڵی میدیا تێگەیشتبوون، بەمەبەستی سازدان و هۆشیاركردنەوەی كۆمەڵانی خەڵكی كوردستان و ئاگاداركردنەوەی دۆستانی دۆزی كورد یەكەمجار (الشرارە) یان لە شام بڵاوكردەوە،  كە هەر لە ناوەكەی و پێناسەكەیەوە ئامانجەكەی دەپێكا (ومن الشرارە تندلع اللهیب) واتە (لە پریشكەكەوە ئاگرەكە هەڵدەگیرسێت) و بەدوای ئەویشدا (رێبازی نوێ) دەرچووێنرا، كە ئەمیشیان دەلالەتی شۆڕشێكی نوێ بوو بە رێبازێكی نوێ.

  ئەم دوو بڵاوكراوەیە  بە هەرسێ قۆناغی تاراوگە و شاخ و شار، توانییان هەشت خوول بەردەوام بن و لەو قۆناغانەشدا هەم دۆزی كورد و ستەملێكراوی گەلی كوردستان، هەم دڕندەیی و رەفتاری فاشیستانەی رژێمی بەعسیان بە دنیای دەرەوە و رێكخراوە مرۆڤدۆستەكان دەگەیاند. 

شان بەشانی (الشرارە) و (رێبازی نوێ) لە نەورۆزی 1979دا رادیۆی دەنگی شۆڕشی عیراق كە دواتر بووە (دەنگی گەلی كوردستان) وەك میدیای بیستراو توانیی هەم میدیا و بڵاوكراوەی نهێنی تێپەڕێنێت و هەم بە هەردوو زمانی كوردی و عەرەبی و بە هەردوو زاراوەی سۆرانی و كرمانجی رێبازی شۆڕش روون بكاتەوە و چالاكیی و نەبەردی  و داستانەكانی  هێزی پێشمەرگەی وەك مژدە دەدایە كۆمەڵانی خەڵك و سنوورە قەدەغەكانی تێدەپەڕاند و  دەچووە هەموو ماڵەكانەوە و ببووە تاكە میدیای متمانە پێكراویی سەردەمی شۆڕش.   

سەرەڕای ئەوەش راگەیاندنی یەكێتی لە شاخ و لە شار و لە مەنفاش خاوەنی گەنجینەیەكی بەهادارە لە كتێب و بڵاوكراوە و ئۆرگانی رەسمی و ناڕەسمی (سیاسی، كەلتووری، ئابووری، هونەری و وەرگێڕان) و دەستگیرۆیی چاپكردنی سەدان و هەزاران بەرهەمی  نووسەران و ئەدیبان بووە، هەریەكە لە رێكخراوەكانی كۆمەڵە و برووتنەوەی سۆشیالیستی و دواتر یەكێتیی شۆڕشگێڕان و رێكخراوە پیشەیی و جەماوەرییەكانیش گۆڤاری مانگانە یان وەرزیی تایبەت بەخۆیان هەبووە.

 لە سەرەتای قۆناغی ئازادیی كوردستانیشەوە لە 1991، كەناڵەكانی سلێمانی و دهۆكی تەلەفزیۆنی گەلی كوردستان و رۆژنامەی كوردستانی نوێ و الاتحاد لە 1992 و دواتر كەناڵی هەولێر و گەشەكردن بەرەو كەناڵی ئاسمانی و سوود وەرگرتن لە میدیای نوێی سەردەم كاروانەكە هەر بەردەوامە.

 ئەمڕۆ ماڵی گەورەی میدیایی یەكێتی، سەرەڕای ئەوەی دەیان ماڵی لێكەوتووەتەوە و لە زۆربەی زۆری پێشكەوتنە تەكنۆلۆژییەكانی سەردەم بەهرەمەندن، بەڵام بە شكۆوە لەبەردەم خەباتی میدیایی كوردی و حزبەكەیاندا راوەستاون و سەربەرزانە درێژە بەو خەباتە میدیاییەی خۆیان دەدەن لەژێر رێنماییەكانی سەرۆك مام جەلال بە پرەنسیپی سێ (رێ) كە، (راستی، رەوانی و رازاندنەوە).

یادی ئەمساڵی راگەیاندن، هاوكاتە لەگەڵ دوو بۆنەدا، یەكەمیان یۆبێلی زێڕینی راگەیاندنی یەكێتییە و هاوكاتیشە لەگەڵ هەڵمەتی كەمپینی هەڵبژاردنی لیستی ٢٢٢ی یەكێتیی نیشتمانیی كوردستان بۆ ئەنجومەنی نوێنەرانی عیراق، لەم قۆناغەشدا میدیای یەكێتییەكەمان بەوە لە میدیاكانی دیكە جیادەكرێتەوە كە هێشتا پابەندە بە سێ (رێ)یەكەوە و راستی ناكاتە قوربانی (سەبقی سەحەفی) و بە رەوانی زانیارییەكانی دەداتە كۆمەڵانی خەڵك و لە پارێزگاریی لە زمان و رازاندنەوەی هەواڵ و راپۆرت و بابەتەكانیشیدا هێشتا لە پێشەنگدایە و جێگای متمانە و رەزامەندیی زۆرینەی خوێنەران و بینەران و بیسەران و پسپۆڕانی زمانە.

لەم یادەدا سەری رێز بۆ گیانی پاكی سەرۆك مام جەلال و سەرجەم شەهیدانی رێگای رزگاریی كوردستان و شەهیدان و كۆچكردووانی راگەیاندنی یەكێتی دادەنەوێنین و سڵاو دەنێرین بۆ هەموو ئەو میدیاكارانەی لەم كاروانە 50 ساڵەیەی خەباتی میدیایی یەكێتیدا، بەردێكیان لەسەر بەردێك داناوە و شوێن دەستێكیان لە پەرەپێدانیدا بەجێهێشتووە.

بۆردی راگەیاندنی یەكێتیی نیشتمانیی كوردستان

PUKMEDIA