هێمن مامه‌ند: ئەو حزبه‌ی زه‌رده‌شت عوسمانی تیرۆركرد هه‌وڵی تیرۆركردنی منیش ده‌دات

PUKMEDIA

وێنەیەکى کۆنگرە رۆژنامەوانییەکە

هێمن مامه‌ندی رۆژنامه‌نوس باس له‌ هه‌وڵه‌كانی تیرۆركردنی ده‌كات و رایده‌گه‌یه‌نێت: ئه‌و حزبه‌ی زه‌رده‌شت عوسمانی تیرۆركرد، هه‌ر ئه‌وانه‌ن ده‌یانه‌وێت منیش تیرۆر بكه‌ن و گروپێكی 10 كه‌سیان بۆ تیرۆركردنم بۆ سلێمانی ناردووه‌.

ئه‌مڕۆ چوارشه‌ممه‌ 5ی11ی2025 ، هێمن مامه‌ند له‌كۆنگره‌یه‌كی رۆژنامه‌وانیدا رایگه‌یاند: شه‌ش مانگ له‌مه‌وبه‌ر ئاسایشی سلێمانی ئاگاداریان كردمه‌وه‌، كه‌ پێویسته‌ وریای خۆم بم، له‌به‌رئه‌وه‌ی چاودێری ده‌كرێم و هه‌وڵی تیرۆركردنم ده‌درێت و چه‌ندینجاریش هه‌ڕ‌ه‌شه‌م لێكرا.

باسی له‌وه‌شكرد: هه‌ر ئه‌و حزبه‌ی كه‌ زه‌رده‌شت عوسمانی تیرۆركرد، شه‌ش ساڵه‌ منی له‌ زێدی باوك و باپیرانی خۆم له‌هه‌ولێری داگیركراو ده‌ركردووه‌، به‌وه‌ش نه‌وه‌ستاوه‌ گروپێكی 10 كه‌سی بۆ ناردوم، له‌سلێمانی تیرۆرم بكه‌ن.

ئه‌وه‌شی روونكرده‌وه‌: له‌ناو ئه‌م گروپه‌دا چوار كه‌سی سه‌ره‌كی هه‌ن، كه‌ سێ دانه‌یان زێره‌ڤانین و سه‌ر به‌ میلیشیای پارتی-ن و پاسه‌وانی به‌رپرسێكی پارتین، دانه‌یه‌كیشیان له‌به‌رامبه‌ر پێدانی به‌ڵێنی دامه‌زراندن ئه‌و كاره‌ ده‌كات، ئه‌مه‌ له‌كاتێكدایه‌ دامه‌زراندن بۆ یه‌كه‌مه‌كانی سه‌ر ئاستی كۆلێژه‌كانیش نییه‌، به‌ڵام له‌به‌رامبه‌ر ئه‌وه‌ی كه‌سێك رۆژنامه‌نوسێك تیرۆر بكات، بۆ ئه‌و تیرۆرسته‌ دامه‌زراندن هه‌یه‌.

له‌ كۆتایی كۆنگره‌ رۆژنامه‌وانییه‌كه‌دا هێمن مامه‌ند، وتی: دوژمنایه‌تی شه‌خسیم له‌گه‌ڵ كه‌س نییه‌ و پرسی، بۆچی ئێمه‌ تیرۆر ده‌كه‌ن؟ له‌وه‌ڵامدا خودی خۆی، وه‌ڵام ده‌داته‌وه‌ و ده‌ڵێت: له‌به‌رئه‌وه‌ی راستییه‌كان و حه‌ق ده‌ڵێین.

ماوەى شەش ساڵە هێمن مامەند بەهۆى هەڕەشەى تیرۆرکردن لەلایەن حزبێکى دەسەڵاتدارى هەولێر لە زێدى خۆى نەماوە و لە سلێمانى نیشتەجێبووە، هاوکات لە ئێوارەیى رۆژى 2ی 9ی 2025، لە گەڕەكی عەقاری سلێمانی، ماتۆڕسوارێك تەقەی لێكرد و برینداری كرد.

PUKMEDIA