کۆمسیۆن: سبەینی 270 هەزار کەس لە هەرێم بەشداری لە دەنگدانی تایبەت دەکەن

میدیاکان

نەبەرد عومەر لێپرسراوی دەستەی هەڵبژاردنەکانی هەرێمی کوردستان لە کۆمیسیۆنی هەڵبژاردنەکان

 سبەینێ9ی11ی2025، لە عیراق و هەرێمی کوردستان دەنگدانی تایبەت بۆ هەڵبژاردنی ئەنجومەنی نوێنەرانی عیراق بەرێوەدەچێت و کۆمسیۆنیش ئاشکرای دەکات: لە هەرێمی کوردستان 270 هەزار کەس بەشداری لە دەنگدانی تایبەت دەکەن.

 نەبەرد عومەر لێپرسراوی دەستەی هەڵبژاردنەکانی هەرێمی کوردستان لە کۆمیسیۆنی باڵای هەڵبژاردنەکانی عیراق لە کۆنگرەیەکی رۆژنامەوانیدا رایگەیاند: کۆمسیۆن هەموو ئامادەکارییەکانی رۆژی دەنگدانی تەواو کردووە و سەرجەم بنکەکانی دەنگدان ئامادە کراون.

 لە بارەی ژمارەی دەنگدەرانی رۆژی دەنگدانی تایبەت لە هەرێمی کوردستان، نەبەرد عومەر ئاشکرای کرد: لە هەرێمی کوردستان 270 هەزار دەنگدەر مافی دەنگدانیان هەیە، کە بەسەر 204 بنکەی دەنگدان و 958 وێستگە دابەش کراون، کە رێکخراوە ناوخۆیی و نێودەوڵەتییەکانی تایبەت بە پرسی هەڵبژاردن چاودێری دەکەن.

راشیگەیاند: تاوەکو ئێستا 10 هەزار کەس کارتی دەنگدانیان وەرنەگرتووەتەوە، بۆیە داوا لە هاووڵاتیان دەکەین بە زووترین کات سەردانی بنکەکان بکەن بۆ وەرگرتنەوەیان کە ژمارەیان 170 بنکەیە.

ئەمەش لەکاتێکدایە، لە سەعات 7:00ی ئەم بەیانییە  8ی 11ی 2025 بانگەشەی هەڵبژاردنی تەواوی حزب و کاندیدەکانی هەڵبژاردنی خولی شەشەمی ئەنجومەنی نوێنەرانی عیراق کۆتایی هات و سبەینێ دەنگدانی تایبەت بەڕێوەدەچێت و رۆژی 11ی 11ی 2025 دەنگدانی گشتی لە سەرانسەری عیراق بەڕێوەبچێت.

 PUKMEDIA