كۆمسیۆن: ده‌نگدان به‌شێوه‌یه‌كی زۆر باش به‌ڕێوه‌ده‌چێت

PUKMEDIA

کۆمسیۆنی باڵای سەربەخۆی هەڵبژاردنەکانی عیراق

كۆمسیۆنی باڵای سه‌ربه‌خۆی هه‌ڵبژاردنه‌كانی عیراق ئه‌مڕ‌ۆ سێشه‌ممه‌ ڕ‌ایگه‌یاند، له‌كاتی هه‌ڵبژاردنی گشتی هه‌رێمی كوردستاندا 27 ئامێری ده‌نگدان توشی كێشه‌ی ته‌كنیكی بوون و دواتر چاره‌سه‌ر كراون و ده‌شڵێت، "ده‌نگدان تا سه‌عات 6:00ی ئێواره‌ به‌رده‌وامده‌بێت.


نه‌به‌رد عومه‌ر سه‌رۆكی ده‌سته‌ی كۆمسیۆنی هه‌ڵبژاردنه‌كانی عیراق له‌هه‌رێم له‌ كۆنگره‌یه‌كی ڕ‌ۆژنامه‌وانیدا ڕ‌ایگه‌یاند: ژماره‌ی ناوه‌نده‌كانی ده‌نگدان له‌هه‌رێمی كوردستان هه‌زار و 312 ناوه‌ندن كه‌ پێكهاتوون له‌پێنج هه‌زار و 599 وێستگه‌ی ده‌نگدان.

ئاماژه‌ی به‌وه‌شكرد: له‌ سه‌ره‌تای ده‌ستپێكردنی پرۆسه‌ی هه‌ڵبژاردن له‌ سه‌عات 7:00ی به‌یانییه‌وه‌، 27 ئامێری ده‌نگدان گرفتی ته‌كنیكیان بۆ دروستبوو، به‌ڵام تیمه‌ ته‌كنیكییه‌كان توانیویانه‌ به‌ خێرایی چاره‌سه‌ریان بكه‌ن.

 
نه‌به‌رد عومه‌ر ئه‌وه‌شیخسته‌ڕ‌وو، ئێستا پرۆسه‌ی ده‌نگدان به‌شێوه‌یه‌كی ئاسایی و به‌شێوه‌یه‌كی ڕ‌ێكخراو له‌ سه‌رتاسه‌ری عیراق و هه‌رێمی كوردستان به‌ره‌وپێش ده‌چێت، ده‌نگدانیش تا سه‌عات 6:00ی ئێواره‌ به‌رده‌وامده‌بێت، دوای كۆتاییهاتنیشی، داتا و زانیاریه‌كان له‌ڕ‌ێگه‌ی ئامێری تایبه‌ته‌وه‌ ده‌نێردرێن بۆ به‌غدا.


سه‌عات 7:00ی به‌یانی ئه‌مڕ‌ۆ سێشه‌ممه‌، هه‌شت هه‌زار و 703 بنكه‌ی ده‌نگدان كه‌ له‌ 39 هه‌زار و 285 وێستگه‌ پێكدێن به‌ڕ‌وی ده‌نگده‌رانی عێراق و هه‌رێمی كوردستان كرانه‌وه‌، 21 ملیۆن و 404 هه‌زار و 291 كه‌س كارتی ده‌نگدانیان وه‌رگرتۆته‌وه‌ ده‌توانن بچنه‌ وێستگه‌كان و به‌شداری له‌ پرۆسه‌ی هه‌ڵبژاردنی ئه‌نجومه‌نی نوێنه‌رانی عێراقدا بكه‌ن، له‌و ژماره‌یه‌ش سێ ملیۆن و 68 هه‌زار و 411 ده‌نگده‌ر له‌ سنوری هه‌رێمی كوردستاندان.

PUKMEDIA