کۆمسیۆن ئاماری نوێی هەڵبژاردن رادەگەیەنێت

PUKMEDIA

ئامێرەکانی پرۆسەی دەنگدان

ئەمڕۆ 12ی11ی2025، کۆمسیۆنی باڵای سەربەخۆی هەڵبژاردنەکانی عیراق، ئاماری نوێی بەشداریی دەنگدەرانی بۆ هەڵبژاردنی ئەنجومەنی نوێنەرانی عیراقی راگەیاندو بەپێی ئامارەکە رێژەی بەشداری 56.11% بووە.

بەپێی ئامارە نوێیەکانی کۆمسیۆن کە کۆپییەکی دەست PUKMEDIA کەوتووە،دوای ئەوەی ئەنجامی 99.98% بەشداری دەنگدەران جیاکرایەوە، ژمارەی بەشداری دەنگدەران لە هەڵبژاردنی گشتی لە کۆی 20 ملیۆن و 63 هەزار و 773 دەنگدەر ،10 ملیۆن 904 هەزار و 637 دەنگدەر بەشداریان کردووە و دەنگیان داوە، بەمەش رێژەی بەشداری گەیشتووەتە  54.35%.

سەبارەت بە دەنگدانی تایبەت کە لە 9ی 11ی 2025 بەڕێوەچوو، کۆمسیۆن ئاشکرای کرد:"ژمارەی دەنگدەرانی دەنگدانی تایبەت یەک ملیۆن و 84 هەزار و 289 دەنگدەر لە کۆی یەک ملیۆن و 313 هەزار و 980 دەنگدەر دەنگیان داوە، بەمەش رێژەی بەشداری لە دەنگدانی تایبەت گەیشتە 82.52% لە سەرتاسەری عیراق".

پەیوەست  بە دەنگدانی ئاوارەکانیش، کۆمسیۆن رایگەیاندووە، کە 20 هەزار و 527 ئاوارە لە کۆی 26 هەزار و 538 دەنگدەر،دەنگیان داوە،بەمەش رێژەی بەشداری 77.35%ی بووە.

لە کۆتایشدا کۆمسیۆنی باڵای سەربەخۆی هەڵبژاردنەکان روونی کردووەتەوە: لە کۆی 21 ملیۆن 404 هەزار و 291 دەنگدەری تۆمار کراو بە تایبەت و گشتییەوە، 12 ملیۆن 9 هەزار و453 دەنگدەر دەنگیان داوە، بەمەش رێژەی بەشداری بریتی بووە لە 56.11%.


PUKMEDIA