28هەمین فێستیڤاڵی نێودەوڵەتی گەلاوێژ بەڕێوەدەچێت

PUKMEDIA

وێنەیەکى فێستیڤاڵى رابردوى گەلاوێژ

 رۆژى پێنجشەممە 20ى11ى2025 ، بۆ ماوەى سێ رۆژ 28هەمین فێستیڤاڵی نێودەوڵەتی گەلاوێژ بەڕێوەدەچێت.

د.ئیبتیسام ئیسماعیل سەرۆکی بنکەی روناکبیری گەلاوێژ، بە وێبسایتى رەسمى یەکێتیى نیشتمانیى کوردستان PUKMEDIA  راگەیاند: فێستیڤاڵی نێودەوڵەتی گەلاوێژ بۆ ماوەى سێ رۆژ، لە شاری سلێمانی هۆڵی تەلاری هونەر بەڕێوەدەچێت و یەکەمین رۆژى سەعات 3 دەستپێدەکات. 

ئاشکرایکرد: یەکەم رۆژی فێستیڤاڵ ئاهەنگی دەستپێکە و چەندین بڕگەی موزیک و گۆرانی تێدا دەبێت و بە بەشداری هونەرمەندان ناسری رەزازی و ئەیوب عەلییە، هەروەها هەر لەیەکەمین رۆژی فێستیڤاڵدا چەندین بڕگەی هۆنراوە و خەڵات هەیە و لە دووەمین رۆژی فێستیڤاڵدا تەوەرێکمان تایبەتە بە 11توێژەر، کە توێژینەوەی هەمەچەشن لەخۆ دەگرێت و توێژەرەکان لە نەتەوەی کورد و عەرەب و فارسن، پاشان بەشداربوانی پیشبڕکێی هۆنراوە و چیرۆک بابەتەکانیان پێشکەش دەکەن، هاوکات  تەوەرێکی دیکەی فێستیڤاڵ زیرەکی دەستکردە لە جیهانی روناکبیری و رۆشنبیریدا بەگشتی.

د. ئیبتیسام ئیسماعیل، ئەوەشى راگەیاند: لە رۆژی سێیەمی فێستیڤاڵدا کە 22ی مانگی 11 دەکات، مەراسیمی کۆتایی فێستیڤاڵە، کە خەڵاتەکان دابەشدەکرێت و چەند بڕگەیەکی مۆزیک و گۆرانی و هۆنراوە خوێندنەوە لە خۆدەگرێت. 

لە کۆتایدا  د.ئیبتیسام ئیسماعیل سەرۆکی بنکەی روناکبیری گەلاوێژ، ئەوەشیروونکردەوە: هەر لە چوارچێوەی فێستیڤاڵدا چەند چالاکیەکی دیکە هەیە، کە یەکێکیان پێشانگای کتێبە، کە خانەی چاپ و بڵاوکراوەکانی کوردی و عەرەبی و فارسین، کە کتێبی کوردی و عەرەبی و ئینگلیزی تێدایە، هەروەها پێشانگایەکی شێوەکاریمان بەناوی هەردوو هونەرمەندی شێوەکاری کۆچکردوی کورد "لالە عەبدە و قەرەنی جەمیل" دەبێت و سێیەمین پێشانگامان بریتیە لە، پێشانگای کاری دەستی خانمانە، هاتنیش بۆ هەمووانە.

فێستیڤاڵی گەلاوێژ ساڵانە لە مانگی تشرینی دووەم لە لایەن بنکەی رووناکبیریی گەلاوێژ بەڕێوەدەچێت و ئەم فێستیڤاڵە لە ساڵی 1996 ھەتا ئێستا بێپچران بەردەوام بووە.

PUKMEDIA