فەرماندەیی ئۆپەراسیۆنە هاوبەشەكان: هێرشكەرانی سەر كێڵگەی كۆرمۆر سزادەدرێن

PUKMEDIA

وێنەی هێرشەكەی سەر كێڵگەی كۆرمۆر

فەرماندەیی ئۆپەراسیۆنە هاوبەشەكانی عیراق رایدەگەیەنێت: هێرشكردنە سەر كێڵگەی گازی كۆرمۆر هەڕەشەیەكی راستەوخۆیە بۆ سەر بەرژەوەندییەكانی گەلی عیراق و كردەوەیەكی تیرۆریستی مەترسیدارە، بۆیە هەر لایەنێك لەپشتی ئەم هێرشە ترسنۆكانەیەوە بێت رووبەڕووی سزا دەبێتەوە و رێوشوێنی یاسایی توندی لەدژ دەگیرێتەبەر.

فەرماندەیی ئۆپەراسیۆنە هاوبەشەكانی عیراق، پەیامێكی لەبارەی هێرشەكانی شەوی رابردووی سەر كێڵگەی نەوتی كۆرمۆر بڵاوكردەوە و رایگەیاند: شەوی رابردوو كێڵگەی كۆرمۆر لە پارێزگای سلێمانی كرایە ئامانج و بەهۆیەوە ئاگر لە یەكێك لە بەشە سەرەكییەكانی ئەم كێڵگە گازییە گرنگە كەوتەوە، هەرچەندە هیچ زیانێكی گیانی لێنەكەوتووەتەوە، بەڵام ئەمە هەڕەشەیەكی راستەوخۆیە بۆ سەر بەرژەوەندییەكانی گەلی عیراق و كردەوەیەكی تیرۆریستی مەترسیدارە بە ئامانجی رێگرتن لە هەوڵەكان بۆ سەقامگیریی و ئاسایش و گەشەكردنی ئابووری وڵات.

راشیگەیاندووە: ئەم هێرشە كاریگەری لەسەر خراپبوونی سیستمی كارەبا بەتایبەتی لە پارێزگاكانی هەولێر و سلێمانی هەیە و زیان بە سەرچاوەكانی وزەی وڵات دەگەیەنێت.

ئەوەشی خستووەتەڕوو: هەر لایەنێك لەپشتی ئەم هێرشە ترسنۆكانەیەوە بێت رووبەڕووی سزا دەبێتەوە و رێوشوێنی یاسایی توندی لەدژ دەگیرێتەبەر.

سەعات 11:30 دەقیقەی شەوی رابردوو، 26ی 11ی 2025، هێرشێكی درۆنی كرایە سەر كێڵگەی گازی كۆرمۆر و بەهۆیەوە ئاستی پێدانی كارەبا بۆ 75% دابەزی، هاوكات وەزارەتی سامانە سروشتییەكان و وەزارەتی كارەبا رایانگەیاند: تەواویی هەناردەی غاز بۆ وێستگەكانی كارەبا راگیراوە.

PUKMEDIA