كۆمسیۆن وەڵامی تانەكان دەداتەوە

PUKMEDIA

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق

كۆمسیۆنی باڵای سەربەخۆی هەڵبژاردنەكانی عیراق، وەڵامی 528 تانەی لەو 872 تانەیە داوەتەوە كە لەئەنجامی هەڵبژاردنی ئەنجومەنی نوێنەرنی عیراق دراون و وەڵامی 122 تانەی دیكەشی ئامادە كردووە.

جومانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عیراق، بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: لە كۆی 872 تانە كە لەئەنجامی هەڵبژاردنی ئەنجومەنی نوێنەرانی عیراق دراون، كۆمسیۆنەكە تا ئێستا وەڵامی 528 تانەی داوەتەوە و رەوانەی دەستەی دادوەریی كۆمسیۆنی كردووە.

راشیگەیاند: دەستەی دادوەریی، پێداچوونەوەی بە وەڵامی كۆمسیۆن بۆ 406 تانە كردووە و لەو ژمارەیەش 36 تانەی رەتكردووەتەوە.

جومانە غەلای ئاماژەی بەوەشكرد: كۆمسیۆنی باڵای سەربەخۆی هەڵبژاردنەكانی عیراق، 122 وەڵامی دیكەی ئامادە كردووە و دەینێرێت بۆ دەستەی دادوەریی كۆمسیۆن.

ئەمەش لەكاتێكدایە، رۆژی 9ی 11ی 2025، هەڵبژاردنی تایبەت بۆ خولی شەشەمی ئەنجومەنی نوێنەرانی عیراق بەڕێوەچوو كە تیایدا ملیۆنێك و 313 هەزار و 980 ئەندامی هێزە ئەمنییەكان مافی بەشداریكردنیان لە دەنگدانی تایبەتدا هەبوو،هەروەها رۆژی 11ی11ی2025،  دەنگدانی گشتی بەڕێوەچوو، كە دەنگدەران لە كۆی حەوت هەزار و 700 كاندید 329 كاندید دەكەنە ئەندامی ئەنجومەنی نوێنەرانی عیراق.

PUKMEDIA