دوای یەکلایکردنەوەی تانەکان دادگای فیدراڵی ئەنجامی هەڵبژاردن پەسند دەکات

نوسینگەی سلێمانی کۆمسیۆن

پرۆسەی هەڵبژاردن

کۆمسیۆنی باڵای سەربەخۆی هەڵبژاردنەکانی عیراق رایدەگەیەنێت: سەرجەم رێکارەکانی ئەو تانانەمان تەواوکردووە کە لە ئەنجامی هەڵبژاردنی ئەنجومەنی نوێنەرانی عیراق دراون و دوای یەکلابوونەوەشیان ئەنجامەکەی رەوانەی دادگای باڵای فیدراڵی دەکەین.

عیماد جەمیل سەرۆکی تیمی راگەیاندنی کۆمسیۆنی باڵای سەربەخۆی هەڵبژاردنەکانی عیراق رایگەیاند: دوای ئەوەی دەستەی دادوەری سەرجەم تانەکان تاوتوێدەکات، ئەنجامی تانەی هەڵبژاردن دەنێردرێت بۆ دادگای فیدراڵی بەمەبەستی پەسندکردنی.

راشیگەیاند: لەئێستاشدا کۆمسیۆن سەرجەم تانەکانی تەواوکردووە و راسپاردەکانیشی پێشکەشی دەستەی دادوەری کردووە، کە پێویستە لەماوەی دە رۆژدا کارەکانی تەواوبکات.

ئەمەش لە کاتێکدایە، رۆژی 11ی11ی2025 هەڵبژاردنی گشتی بۆ خولی شەشەمی ئەنجومەنی نوێنەرانی عیراق ئەنجامدرا و رۆژی 27ی11ی2025 ئەنجامی کۆتایی هەڵبژاردنەکە راگەیەندرا،  دواتریش کۆمسیۆنی باڵای سەربەخۆی هەڵبژاردنەکانی عیراق رایگەیاند: 872 تانەمان دژ بە ئەنجامی هەڵبژاردنی ئەنجومەنی نوێنەرانی عیراق رەوانەی دەسەڵاتی دادوەری هەڵبژاردنەکان کردووە.


PUKMEDIA