تومه‌ن دابه‌زینی زۆری به‌خۆیه‌وه‌ بینیوه‌

Reuters

وێنەى تومەن و دۆلارى ئەمریکى

به‌راورد به‌چه‌ند مانگی رابردوو نرخی تومه‌ن به‌رامبه‌ر دیناری عیراقى و دۆلاری ئه‌مریكی دابه‌زینی زۆری به‌خۆیه‌وه‌ی بینوه ‌و چاوه‌ڕوان ده‌كرێت زیاتریش دابه‌زێت.

ئه‌مڕۆ له ‌بازاڕه‌كانی هه‌رێمی كوردستان، نرخی 100 دۆلاری ئه‌مریكی به‌رامبه‌ر 11 ملیۆن و 950 هه‌زار تومه‌نه‌، به‌ڵام له‌ناو تارانی پایته‌ختی ئێران نرخی 100 دۆلاری ئه‌مریكی كه‌ ده‌کاته‌ 141 هه‌زار دیناری عیراقی، به‌ 12 ملیۆن و 100 هه‌زار تومەنە، به‌مه‌ش بۆ یه‌كه‌مینجاره‌ له ‌ماوه‌ی چه‌ندین ساڵی رابردوودا نرخی تومه‌ن به‌رامبه‌ر دینار و دۆلار به‌و شێوه‌یه‌ دابه‌زێت.

پسپۆڕانی ئابووری كه‌مبوونه‌وه‌ی نرخی تومه‌ن ده‌گه‌ڕێننه‌وه‌ بۆ ئه‌و بارودۆخه‌ی له‌ خۆرهه‌ڵاتی ناوه‌ڕاست هه‌یه‌، به‌تایبه‌ت پرسی ئێران و ئیسرائیل، كه‌ نێوانیان گرژی زیاتری به‌خۆیه‌وه‌ بینیوه‌.

دابه‌زینی به‌رده‌وامی به‌های تومه‌ن راسته‌وخۆ کاریگەرى بۆ نرخی كاڵا و خزمه‌تگوزارییه‌ سه‌ره‌تاییه‌كان لە ئێران هه‌یه‌ و توانای كڕینی هاووڵاتییان به‌ تایبه‌ت توێژه‌ مامناوه‌ند و هه‌ژاره‌كان لاواز ده‌كات.

جگە لەوەش گەمارۆ ئابوورییەکان، هەڵاوسانی ناوخۆیی، دۆخی سیاسی ناوچەکە کارگەرى لەسەر نرخى تومەن کردووە.

PUKMEDIA