وردەکاریی ئۆپەراسیۆنە فراوانەکەی بەرەبەیانی ئەمڕۆی کۆماندۆ

راگەیاندنى هێزەکانى کۆماندۆ

لۆگۆى هێزەکانى کۆماندۆ

فەرماندەیی هێزەكانی كۆماندۆی كوردستان رایگەیاند: كۆماندۆی كوردستان ئۆپەراسیۆنێكی هاوبەشی لە سنوری رۆژئاوای كەركوك ئەنجامدا و ژمارەیەك حەشارگە و ئاسەواری تیر*ۆر*ستان دۆزرانەوە و چەند كیلۆمەترێكی سنورەكەش بەتەواوی كێوماڵكرا.

لە راگەیەنراوێکدا کە کۆپیەکى بۆ  PUKMEDIA  نێردراوە، ئەوە روونکراوەتەوە: ئەمڕۆ شەممە 6ی كانونی یەكەمی 2025 لە سەعات 04:00 بەرەبەیانی فەرماندەیی هێزەكانی كۆماندۆی كوردستان لەسەر بنەمای کۆکردنەوەی زانیاری و بە هاوبەشی لەگەڵ بەڕێوەبەرایەتی گشتی ئۆپەراسیۆنەكانی ئاسایش و فەوجی كەركوكی دژەتیرۆری عیراق و بەهەماهەنگی فڕۆكە و هێزی هاوپەیمانان، ئۆپەراسیۆنێكی هاوبەشی بۆ سنورەكانی گوندی (تویلعە)ی سەربە قەزای دوبز لە سنوری رۆژئاوای كەركوك ئەنجامدا.

ئاماژەبەوەشدراوە: لەماوەی رابردوودا لە سنورەكانی دەرەوەی گوندی (تویلعە) جموجوڵی تیرۆرستان، دەستنیشانكراوە و شوێن پێیان هەڵگیراوەتەوە، هەروەها چەند شوێنێكیان لەو سنورە وەك مۆڵگە و حەشارگە بەكارهێناوە، بۆیە لە ئۆپەراسیۆنەكەدا سەرجەم ئەو شوێنانە لەناوبران، ژمارەیەك بۆمبیش پوچەڵكرانەوە.

ئەوەشخراوەتەڕوو: "كوڕانی كۆماندۆی كوردستان" لەگەڵ بەڕێوەبەرایەتی گشتی ئۆپەڕاسیۆنەكانی ئاسایش و فەوجی كەركوكی دژەتیرۆری عیراق لە چەند قۆڵێكەوە بەفراوانی (8) كیلۆمەتری سنورەكەیان كێوماڵ كرد و ناوچەكە لە ئاسەواری تیرۆرستان پاككرایەوە.

هەر لە راگەیەنراوەکەدا ئەوە هاتووە: هاوكات، فەرماندەی فەرماندەیی هێزەكانی كۆماندۆی كوردستان داوای لە "كوڕانی كۆماندۆ" کرد بەردەوام بن، لەسەر ئەم جۆرە ئۆپەراسیۆنانە بۆ كۆتاییهێنان بە مۆڵگە و حەشارگەکانی تیر*ۆرستا*نی د*اع*ش و هاوشێوەكانیان لە ناوچەكە.

PUKMEDIA