روونكردنەوەیەكی كورت و پێویست لەسەر قسە چەواشەكاری و بێ ناوەڕۆك و بێ کردارەکانی عەلی حەمەساڵح

PUKMEDIA

بارەگای بۆردی راگەیاندنی یەكیتیی نیشتمانیی كوردستان

دوای تێپەڕبوونی چوار رۆژ بەسەر لافاوەكەی سنووری چەمچەماڵ و ئەو كارەساتە سروشتییەی كە زیانێكی یەكجار زۆری بەهاووڵاتیان و دامودەزگا حكومییەكانی ناوچەكە گەیاندووە، ئەوجا بەڕێز عەلی حەمەساڵح و تیمەكەی تەشریفیان بردە قەزای چەمچەماڵ و دوای چركاندی چەند سێڵفییەك و لێدوانێكی چەواشەكاریانە چەمچەماڵیان بەجێ هێشت!!!.

لەسەر چەواشەكارییەكانی کاک عەلی كە دەڵێت: (ئەوەی میدیای دەسەڵات (یەكێتی) باسی دەكات هیچی راست نییە)، بەپێویستمان زانی ئەم خاڵانە بخەینەڕوو: 

١- كاكە عەلی، یان چاوەكانت كزن و پێویستیت بە دروستكردنی چاویلكەی تەندروستی هەیە، ئەگینا چۆن ئەو دیمەنانە نابینی كەهەر لەیەكەم رۆژی كارەساتەكەوە تیمی یەكێتی لەحكومەت بەسەرۆكایەتی هەڤاڵ قوباد تاڵەبانی مەیدانیانە لەگەڵ خەڵكی چەمچەماڵدان و لەسەر بڕیاری سەرۆك بافڵ تاڵەبانی-ش هەرچی توانای حزبی هەیە شانبەشانی تیمی حكومی لەهەوڵی كەمكردنەوەی ئازارەكانی خەڵكی ناوچەكەدان .

٢- ئەگەر چاوەكانت كزنین ، ئەوا ناخت ئەوەندە رەشە كە نەتانتوانی لە چەچەماڵ سەردانی تەنها یەك تیم لەو دەیان تیمانە بكەن كە چوار رۆژە لەو قەزایە شەونخونی دەكەن و سەرقاڵی پاككردنەوە و نەهێشتنی ئاسەواری لافاوەكە و چونییەتی رێگریكردنن لە دووبارە بوونەوەی ئەو كارەساتە سروشتییە.

٣- هەر زوو هەڤاڵ قوباد تاڵەبانی لەبەردەم میدیاكاندا رایگەیاند: (كە كەسانی كەمتەرخەم سزادەدرێن و قەرەبووی زیانلێكەوتوانی لافاوەكەش دكرێتەوە، بۆ ئەو مەبەستەش چەند لیژنەیەك پێكهێنراون و لیژنەكان خەریكی جێبەجێكردنی ئەركەكانی خۆیانن)، كەچی جەنابت تازە بەتازە دێیت و خۆت دەكەیت بە خەبیری لافاوی سروشتی و لە پێش كۆتاییهاتنی ئەنجامی لیژنەكان هەوڵی چەواشەكاری دەدەیت !!!. قسەیەكی كوردەواری هەیە دەڵێت: (ئەگەر هیچت پێنەكرێت، یان هیچی لێنەزانیت، بێدەنگی هەڵبژێریت باشترە).

 ٤- هاوپیشەكانت (پەرلەمانتارانی یەكێتی) دوورلە سێڵفیگرتن بۆ ماوەی چوار رۆژە لەناو قوڕ و لیتەی پاش لافاو شانبەشانی تیمەكان و وەكو نوێنەرانی راستەقینەی خەڵكی ناوچەكە سەرقاڵی یارمەتیدانی هاووڵاتییان و پاككردنەوەی ماڵی هاووڵاتیانن و چەمچەماڵیان بەجێنەهێشتووە،  بۆیە ئەگەر بەڕاست خۆت بەنوێنەری خەڵك دەزانیت، دەبووایە هاوشێوەی پەرلەمانتارانی یەكێتی لە یەكەم رۆژی كارەساتەكەوە بچیتە چەمچەماڵ و لەگەڵ خەڵكی لێقەوماودا بمێنیتەوە و واز لە سێڵفی گرتن و لێدوانی بێ كردار بهێنیت، نەك بۆ ماوەی چوار رۆژ لەدوورەوە و لەڕێی میدیاو سۆشیاڵ میدیاوە سەیری دیمەنەكانی ئەو كارەساتە سروشتییە بكەیت.

٥ - وەلێ ئەگەر دەتەوێت لە کاتی روودانی کارەساتێکی پڕ ئازاری وەکو لافاوەکەی چەمچەماڵ بۆ مەرامی هەڵبژاردن و کۆکردنەوەی دەنگ کە هێشتا چوارساڵی ماوە لەسەر سۆزی هاوڵاتیان کاربکەیت ، ئەوە زۆر دورە لەئاکاری سیاسی و ئینسانی .

٦- لە کۆتایدا دەڵێین ئەگەر ئێوە و هاوئاوازەکانتان ئیرادەو نیەتی یارمەتیدانی لایەنە پەیوەندیدارو خەڵکی لێقەوماوتان نییە، هیچ نەبێ هەوڵی دووبەرەکی نەدەن وازبێنن با لایەنە پەیوەندیدارەکان بتوانن ئەرکەکانی خۆیان جێبەجێ بکەن . نەک بیر لە جێبەجێکردنی مەرامێکی شاراوە بکەنەوە کە ببێتە هۆی ئاڵۆزترکرنی دۆخی ناوچەکە و  لاوازکردنی ئیرادەی چارەسەرکردنی کێشەکان . 
 
  بەشی هەڵسەنگاندن و بەدوواداچونی بۆردی راگەیاندنی یەكێتیی نیشتمانیی كوردستان

PUKMEDIA