عیراق 24 ملیار دینار بۆ جوتیارانی هەرێم دەنێرێت

PUKMEDIA

گەنمی جووتیاران

عیراق 24 ملیار دیناری دیكەی وەك شایستەی دارایی گەنمی جووتیارانی هەرێمی كوردستان ناردووە.
 
كەمال موسلیم، وەزیری بازرگانی و پیشەسازیی هەرێمی كوردستان، رایگەیاند: حكومەتی عیراق 24 ملیار دیناری دیكەی وەك شایستەی دارایی گەنمی جووتیارانی هەرێمی كوردستان ناردووە و پارەكە كراوە بە چەك.

راشیگەیاند: لەئیستادا تەنها رێكارە بانكی و كارگێڕییەكان بۆ دابەشكردنی پارەكە بەسەر جوتیارانداماون.
 
ئەمەش لەكاتێكدایە، رۆژی 26ی ئایار، وەزارەتی دارایی بەشی یەكەمی شایستە داراییەكانی گەنمی جووتیارانی خەرجكرد، رۆژی 12ی6ی2025 یش وەزارەتەكە بەشی دووەمی شایستە داراییەكانی گەنمی جووتیارانی بەبڕ‌‌ی 500 ملیار دینار خەرج كرد، هاوكات رۆژی 10ی حوزەیرانی 2025 بەبازاڕ‌كردنی گەنمی هەرێمی كوردستان دەستیپێكرد و سایلۆكان بە بڕ‌ی 850 هەزار دینار بۆ هەر تۆنێك گەنم، گەنمیان لە جووتیاران وەرگرتووە و بڕ‌یارە بۆ ئەمساڵ وەزارەتی كشتوكاڵ 400 هەزار تۆن گەنم لەجووتیارانی هەرێمی كوردستان وەربگرێت.

PUKMEDIA