دادگای فیدراڵی ئەنجامی هەڵبژاردنی پەسەندکرد

PUKMEDIA

بینای دادگای فیدراڵی

ئەمڕۆ یەک شەممە 14-12-2025  دادگای باڵای فیدراڵی عیراق ئەنجامی خولی شەشەمی هەڵبژاردنی ئەنجومەنی نوێنەرانی پەسەندكرد، بەمەش وادە دەستورییەكان بۆ دانیشتنی پەرلەمان و هەڵبژاردنی دەستەی سەرۆكایەتی پەرلەمان، پاشان هەڵبژاردنی سەرۆك كۆمارو دواتریش متمانەبەخشین بە حكومەت دەستپێدەكات.

ناوەندی راگەیاندنی دادگای فیدراڵی لەبەیاننامەیەکدا کەکۆپییەکی دەست PUKMEDIA کەوتوە رایگەیاند: دادگای باڵای فیدراڵی لەدانیشتنی ئەمڕۆیدا بەئامادەبونی سەرۆکی دادگا دادوەر مونزیر ئیبراهیم حەسەن و سەرجەم ئەندامانی، ئەنجامی هەڵبژاردنی خولی شەشەمی ئەنجومەنی نوێنەرانی عیراقی پەسەندکرد.

ئاماژەی بەوەشکراوە، دادگای فیدراڵی لە کاتی پێداچوونەوە و وردبوونەوە، بۆی دەرکەوتووە کە پرۆسەی دەنگدانی گشتی بۆ هەڵبژاردنی ئەنجومەنی نوێنەرانی عیراق سەرجەم مەرجە دەستووری و یاساییەکانی خۆی بەدیهێناوەو هیچ پێشێلکارییەکی نەکردووە، بۆیە بە پشتبەستن بە بڕگەی حەوتی ماددەی (93)ی دەستوور دادگای فیدراڵی بڕیاریدا بە پەسەندکردنی ئەنجامی کۆتایی هەڵبژاردنی گشتی.

دادگا بڕیاریشیدا هەرسێ سەرۆکایەتییەکەی حکومەت لەو پەسەندکردنە ئاگادار بکاتەوە.

PUKMEDIA