قوباد تاڵەبانی: هەموو سەرچاوە داراییەكان بۆ قەرەبووكردنەوەی زیانلێكەوتووان بەكاردەهێنین

PUKMEDIA

سەردانی قوباد تاڵەبانی بۆ چەمچەماڵ

قوباد تاڵەبانی رایدەگەیەنێت: دڵمان لای یەكە بە یەكەی زیانلێكەوتووان و خەڵكی ئازیزی چەمچەماڵ و دەوروبەرییەتی و دڵنیایان دەكەینەوە تا كۆتایی لەگەڵیان دەمێنینەوە و هەمووان قەرەبوو دەكرێنەوە، بۆ ئەم مەبەستەش هەموو سەرچاوە داراییەكان بەكاردەهێنین، راشیگەیاندووە:  رێوشوێنی پێویست و زانستی دەگرینەبەر بۆ ئەوەی كارەساتی هاوشێوە دووبارە نەبێتەوە.

قوباد تاڵەبانی، جێگری سەرۆكوەزیرانی هەرێم رایگەیاند: بۆ جاری دووەم سەردانی چەمچەماڵی ئازیزمان كرد بە مەبەستی دەربڕینی هاوخەمی لەگەڵ خانەوادە و كەسوكاری سەربەرزی شەهید ئاكۆ سابیر و هەروەها بەدواداچوون بۆ چۆنییەتی كاركردنی هەردوو یەكەی فریاكەوتنی خێرای مرۆیی و چاكبوونەوە و كۆمیسیۆنی لێكۆڵینەوە كە لە سەردانی یەكەمدا فەرمانی پێكهێنانمان بۆ دەركردبوون.

راشیگەیاند: جێی دەستخۆشی و پێزانینە كە یەكەی فریاكەوتنی خێرا بە هاوكاریی خەڵكی خێرخواز و خۆبەخش و سەرمایەدارەكان و هەموو لایەنە پەیوەندیدارە حكومییەكان تا رادەیەكی باش توانیویانە خزمەتی زیانلێكەوتووان بكەن و بەردەوامن لە جێبەجێكردنی ئەركەكەیان، هەموو دانیشتووانی چەمچەماڵ و دەوروبەری دڵنیا دەكەینەوە لە ئەمڕۆ بە دواشەوە هەروەك رۆژانی پێشوو سات بە سات لەگەڵ لیژنەكە بەردەوام دەبین تا ئەو كاتەی هەموو زیانلێكەوتووان بە تەواوی قەرەبوو دەكرێنەوە و بۆ ئەم مەبەستەش هەموو سەرچاوە داراییەكان بەكاردەهێنین.

قوباد تاڵەبانی ئاماژەی بەوەشكردووە: سوپاسی ئەندامانی كۆمیسیۆنی لێكۆڵینەوەش دەكەم كە لە چەند رۆژی رابردوودا بە شێوەیەكی زانستی لێكۆڵینەوەیان لە رووداوەكە و كەمتەرخەمییەكان و چۆنییەتی رێگریكردن لە دووبارەبوونەوەی رووداوی هاوشێوە لە داهاتوودا كردووە.

ئەوەشی خستووەتەڕوو: بەپێی ئەنجامی لێكۆڵینەوەكە هەر یەكە لە بەڕێزان قائیمقامی چەمچەماڵ، سەرۆكی شارەوانیی چەمچەماڵ، سەرۆكی شارەوانیی ناحیەی شۆڕش و بەڕێوەبەری پەروەردەی چەمچەماڵ لە پۆستەكانیان بەخشران و بەڕێوەبەری ناحیەی شۆڕشیش كە ئامادەنەبوو داوای بەخشین بكات، بەڵام بەپێی راپۆرتی كۆمیسیۆن كەمتەرخەم بووە، لێپرسینەوەی لەگەڵدا دەكرێت.

جێگری سەرۆكوەزیرانی هەرێم راشیگەیاندووە: جارێكیتر دووپاتی دەكەینەوە دڵمان لای یەكە بە یەكەی زیانلێكەوتووان و خەڵكی ئازیزی چەمچەماڵ و دەوروبەرییەتی و دڵنیایان دەكەینەوە تا كۆتایی لەگەڵیان دەمێنینەوە و هەمووان قەرەبوو دەكرێنەوە و رێوشوێنی پێویست و زانستیش دەگرینەبەر بۆ ئەوەی كارەساتی هاوشێوە لە داهاتوودا دووبارە نەبێتەوە.

لە كۆتاییدا ئاماژەی بەوەشكردووە:  لە دڵەوە سوپاسی ئەو هاوسۆزی و هاوخەمییەی هەموو خەڵكی كوردستان دەكەم، هەروەها سوپاسی ئەو خەڵكە ئازیزە لە هەموو شار و شارۆچكە جیاوازەكانی كوردستان دەكەم كە هەر كەس بەپێی توانای دارایی خۆی یارمەتی زیانلێكەوتووانی كردووە. سوپاسی تایبەتیش بۆ هەموو خەڵكی خۆبەخش و رێكخراوەكان و لایەنە پەیوەندیدارەكان و سەرمایەدارەكان دەكەم بۆ یارمەتیدانی خەڵكی چەمچەماڵ و زیانلێكەوتووان، ئەم هەستی هاوسۆزی و هاوكارییەی گەلەكەمان لەكاتی كارەسات و ناخۆشیدا گەورەترین سەرمایەی نیشتمانییە و جێی شانازی و سەربەرزی و لە هەمان كاتیشدا ساڕێژكەرەوەی برینەكانە.

PUKMEDIA