شێخ جەعفەر شێخ مستەفا پێشوازیی لە وەفدێکی هاوبەشی زانکۆ و وەرزشکارانی ئیلام دەکات

نوسینگەى رۆژنامەوانى شێخ جەعفەر شێخ مستەفا

وێنەیەکى دیدارەکە

ئەمڕۆ پێنجشەممە 18ی 12ى 2025، شێخ جەعفەر شێخ مستەفا، لێپرسراوی ئەنجومەنی پاراستنی بەرژەوەندییە باڵاکانی یەکێتیی نیشتمانیی کوردستان، لە بارەگای ئەنجومەن، پێشوازیکرد لە وەفدێکی هاوبەشی زانکۆی ئیلام و وەرزشکارانی دێرینی پارێزگای ئیلامی ئێران، بەسەرۆکایەتی د. بیهرۆز علی شاە ناسری سەرۆکی زانکۆی ئیلام.

لە دیدارێکدا کە ژمارەیەک لە وەرزشکارانی دێرینی سلێمانی ئامادەیبوون، شێخ جەعفەر خۆشحاڵی خۆی بەسەردانی وەفدەکە دەربڕی و رایگەیاند: کە وەرزش و زانست دوو بواری گرنگن و کاریگەریی راستەوخۆیان هەیە، لەسەر پێشکەوتن و درەخستنی رووی گەشی هەر کۆمەڵگەیەک، هیوایخواست سەردانەکە ببێتە سەرەتایەک بۆ دروستکردنی پردێکی پتەوی پەیوەندی نێوان وەرزشکاران و زانکۆی ئیلام لەلایەک و هەرێمی کوردستان، بەتایبەتی وەرزشکاران و زانکۆی سلێمانی لەلایەکی دیکە.

لەبەرامبەردا، د.ناسری بەناوی وەفدی میوانەوە، سوپاسی شێخ جەعفەری کرد و رایگەیاند: پەیوەندی نێوان ئیلام و سلێمانی پەیوەندییەکی باشە و خوازیارن لەداهاتوودا لە هەموو بوارەکاندا، بەتایبەتی لەسەر هەردوو ئاستی زانستی و کەلتووری زیاتر پەرەی پێبدرێت.

PUKMEDIA