دابه‌شكردنی هاوكاری به‌سه‌ر زیانلێكه‌وتوانی چه‌مچه‌ماڵ به‌رده‌وامه‌

PUKMEDIA

پڕۆسەى هاوکارى کردنى زیانلێکەوتوانى لافاوەکەى سنورى چەمچەماڵ

رۆژی دووهه‌می پڕ‌ۆسه‌ی دابه‌شكردنی هاوكارییه‌كان به‌سه‌ر خه‌ڵكی زیانلێكه‌وتوانی چه‌مچه‌ماڵ به‌رده‌وامی هه‌یه‌ و پوڵا شه‌هید سیروان، ئه‌ندامی چاودێری بۆردی، هاوكارییه‌كانی زیانلێكه‌وتوانی لافاوه‌كه‌ش، رایده‌گه‌یه‌نێت: "دوای ته‌واوبوونی هاوكاری دابه‌شكردن به‌سه‌ر ئه‌و كه‌سانه‌ی ماڵه‌كانیان زیانی به‌ركه‌وتووه‌، قۆناغی داهاتوو هاوكاری ئه‌و كه‌سانه‌ ده‌كرێت كه‌ ئۆتۆمبێل و كۆگا و دوكانه‌كانیان زیانی به‌ركه‌وتووه‌"، هاوكات هۆكاری سكاڵاكانیش روونده‌كاته‌وه‌.

پوڵا شه‌هید سیروان، ئه‌ندامی چاودێری بۆردی، هاوكارییه‌كانی زیانلێكه‌وتوانی لافاوه‌كه‌ی چه‌مچه‌ماڵ به‌ وێبسایتی ره‌سمی یه‌كێتیی نیشتمانیی كوردستان PUKMEDIA  ی راگه‌یاند: له‌ درێژه‌ی دابه‌شكردنی هاوكارییه‌كان بۆ زیانلێكه‌وتوانی سنووری چه‌مچه‌ماڵ، ئه‌مڕ‌ۆ هاوكاری به‌سه‌ر زیانلێكه‌وتوانی ناحیه‌ی ته‌كیه‌ و شۆڕ‌ش و ئاغجه‌له‌ر دابه‌شده‌كرێت.

روونیشیكرده‌وه‌: دوێنێش دووشه‌ممه‌ 22ی12ی2025 زیاتر له‌ 600 خانه‌واده‌ هاوكاری كراون و دوای هاوكاری كردنی ئه‌و كه‌سانه‌ی كه‌ ماڵه‌كانیان زیانی به‌ركه‌وتووه‌، هاوكاری ئه‌و كه‌سانه‌ ده‌كرێت كه‌ ئۆتۆمبێل و كۆگا و دوكانه‌كانیان له‌ لافاوه‌كه‌دا زیانی به‌ركه‌وتووه‌.

راشیگه‌یاند: ئه‌گه‌ر خه‌ڵكێك ناڕ‌ازی بوو، به‌شی سكاڵامان هه‌یه‌ و له‌وێ سكاڵا تۆماربكه‌ن، دواتر له‌ رێی لیژنه‌وه‌ سه‌ردانی ئه‌و ماڵانه‌ ده‌كرێته‌وه‌ جارێكی دیكه‌ و هه‌ڵسه‌نگاندن ده‌كرێته‌وه‌.

سه‌باره‌ت به‌ هۆكاری سكاڵای هاووڵاتییان روونیكرده‌وه‌: هۆكاری ئه‌وه‌ی كه‌ خه‌ڵكانێك سكاڵایان هه‌یه‌، ئه‌وه‌یه‌ كه‌ له‌و كاته‌ی لیژنه‌كان سه‌ردانی ئه‌و ماڵانه‌یان كردووه‌ و هه‌ڵسه‌نگاندنیان بۆ زیانه‌كان كردووه‌، خۆیان له‌وێ نه‌بوون و نه‌یانتوانیووه‌ هه‌موو زیانه‌كان تۆماربكه‌ن.


 PUKMEDIA