لەسلێمانی و هەولێر 2200 مێگاوات كارەبا كەمتر بەكاردەهێنرێت

PUKMEDIA

بەكارهێنانی كارەبا

بەڕێوەبەری گشتیی كارەبای سلێمانی رایدەگەیەنێت: خواست لەسەر كارەبا كەمی كردووە و لەسنووری پارێزگاكانی سلێمانی و هەولێر 2200 مێگاوات كارەبا كەمتر بەكاردەهێنرێت، چونكە هاووڵاتییان بەپێی پێویستی خۆیان كارەبا بەكاردەهێنن، بەمەش لۆد دروست نابێت و بەكارهێنانی كارەبا كەمدەبێتەوە.

ئەندازیار ئەنوەر حەمەسەعید، بەڕێوەبەری گشتیی كارەبای سلێمانی، بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: بەجێبەجێ كردنی پڕۆژەی روناكی و بوونی كارەبا بە 24 سەعاتی، رێژەی بەكارهێنانی كارەبا بە ئاسایی لە %15 دادەبەزێت، چونكە لۆد كەمدەبێتەوەو سیستم جێگیر دەبێت،  هاوكات زیاد بوونی نرخی كارەباش هۆكارێكی دیكەیە بۆ ئەوەی هاووڵاتییان كارەبا كەمتر بەكاربهێنن.

روونیشیكردەوە: مەبەست لەجێگیربوونی سیستم، واتا هاووڵاتییان بەپێی پێویستی خۆیان كارەبا بەكاردەهێنن و بەمەش لۆد دروست نابێت و بەكارهێنانی كارەبا كەمدەبێتەوە، بەڵام بەكارهێنانی كیلۆوات زیادیكردووە، ئەمەش لەكاتێكدایە پێشتر لەبەرئەوەی كارەبای نیشتمانی سێ بۆ چوار سەعات دەدرا بەهاووڵاتیان، دەبووە هۆی ئەوەی خواست لەسەر كارەبا زیادببێت.

ئەوەشی خستەڕوو: لەسنووری پارێزگای سلێمانی بەڕێژەی %40 بەكارهێنانی كارەبا كەمی كردووە، بەشێوەیەك لەمانگی12 ی ساڵی 2024 ەوە بۆ مانگی 12ی ساڵی 2025، لەسلێمانی 900مێگاوات كارەبا كەمتر بەكاردەهێنرێت، لەهەولێریش 1300 مێگاوات كارەبا كەمتر بەكاردەهێنیرێت، واتا خواست لەسەر كارەبا كەمی كردووە.

ئەندازیار ئەنوەر حەمەسەعید، ئەوەشی خستەڕوو: لەڕابردوودا بۆ پێدانی  چوار سەعات كارەبا، پێویستمان بە پێنج هەزار مێگاوات كارەبا هەبوو، بەڵام ئێستا لەبەرئەوەی سیستم جێگیربووە، دەتوانین بە سێ هەزار مێگاوات ئەو كارەبایە بە هاووڵاتییان بدەین و ئێستا هاووڵاتییان لەڕووی بەكارهێنانی كیلۆواتەوە زیاتر بەكاردەهێنن.

PUKMEDIA