کۆتا هەفتەی هەڵمەتی زاگرۆسانە لە 9 شوێن بەڕێوەدەچێت

PUKMEDIA

هەڵمەتی زاگرۆسانە بۆ چاندنی بەڕوو

هەڵمەتی زاگرۆسانە بۆ سەوزکردنی کوردستان لەهەفتەی چوارەم و کۆتاییدایە و رۆژی هەینی هەڵمەتێکی فراوان لە (زنجیرە چیاى بەرانان و بنارى بەمۆ و پیرەمەگرون و سەرگەڵو و بیارە و قەڵادزێ و سەیدسادق و دۆڵى جافایەتى و پیرەمەگرون) بەڕێوەدەچێت.

هەڵمەتی زاگرۆسانە، کەهەڵمەتێکی فراوانە بۆ رواندنی بەڕوو لە شاخەکانی کوردستان، ماوەی نزیکی مانگێکە دەستیپێکردوەو ژمارەیەکی زۆر بەڕوو لە زۆرینەی ناوچە شاخاوییەکی کوردستان روێندراوە، کە رۆژی هەینی 26-12-2025 لەهەفتەی چوارەمی هەڵمەتەکەدا کە بەکۆتایی هەڵمەتەکە هەژمار دەکرێت، لە 9 شوێنی کوردستان بەڕێوەدەچێت.

1-سلێمانى – زنجیرە چیاى بەرانان – نزیک ئەشکەوتى هەزارمێرد، 2-گەرمیان - بنارى بەمۆ – سەرتەکى بەمۆ، 3-پیرەمەگرون – تەنگى تابین، 4-سەرگەڵو – چیاى گردەڵ، 5-بیارە – ملەى چنارە، 6-قەڵادزێ – گوندى داودێ – قوتکى ئاڵان، 7-سەیدسادق – شاخى پشت گوندى بەرکەوران، 8-دۆڵى جافایەتى – شاخى پیربایز، 9-پیرەمەگرون – گوندى قەرەچەتان – قوڵەڕەش.

ئامانجەکانی هەڵمەتی "زاگرۆسانە"

ئەم هەڵمەتە ژینگەییە چەندین ئامانجی سەرەکی لەخۆ دەگرێت، کە سەرجەمیان لە پێناو داهاتوویەکی سەوزتردان:

• زیندووکردنەوەی سروشت و بەخشینی ژیان بە ژینگەی زاگرۆس، بە شێوەیەک کە رۆژ لە دوای رۆژ رۆڵی زیندووکردنەوەی سروشت ببینین.

• هۆشیارکردنەوەی خەڵک بۆ گرنگی پاراستن و هێشتنەوەی دارستانەکانی زاگرۆس.

• بە کولتوورکردنی چاندن و کاری هەرەوەزی بۆ پاراستنی ژینگە.

• زیندووکردنەوەی کولتووری ژینگەیی زاگرۆس نشینان و بەردەوامیدان پێی.

• جێگیرکردنی فەرهەنگی پاراستنی دارستانەکانی زاگرۆس وەک بەشێک لە کولتووری ژینگەپارێزی گەلانی زاگرۆس.

مێژووی "زاگرۆسانە":

• کلتووری چاندن لە چیای زاگرۆسدا زۆر کۆنە و ئەم کلتوورە سەوزە وەک میراتێک بۆ نەوەکانی ئێستا ماوەتەوە. چالاکیی "زاگرۆسانە" لەساڵى 2018ـەوە لەو ناوچانە دەکرێت کە چیای زاگرۆس پێیاندا تێپەڕ دەبێت. لە هەموو ناوچەکانی زاگرۆس دەستیپێکردووە و ساڵانە لەم کاتانەدا لە هەموو پارێزگاکانی دەوروبەری زاگرۆسەوە بە بانگهێشتی ئەنجوومەنە ژینگەپارێزییەکان و بەپێی کەشوهەوای زاگرۆس، دەست بە چاندنی بەڕوو و تۆوی درەختەکان دەکرێت.

• زاگرۆسانە بۆ یەکەمجار لە 2018/11/2 لە رۆژهەڵاتى کوردستان و باشورى کوردستان ئەنجامدراوە.

کاتی ئەنجامدانی "زاگرۆسانە":

هەموو ساڵێک لە وەرزی پاییزدا و دوای دەستپێکردنی بارانبارینی پاییز، هەڵمەتی زاگرۆسانە دەستپێدەکات.

• ماوەی هەڵمەتەکە: بەگشتى نزیکەی 25 رۆژ بەردەوام دەبێت، بەڵام چالاکییەکان بەپێی پێویست و لە کاتە گونجاوەکاندا درێژەیان دەبێت.

PUKMEDIA