عیراق ئەو جۆرە پلاستیکە قەدەغەدەکات کە یەکجار بەکاردێت

VOA

پاشماوەی پلاستیک

وەزارەتی ژینگە هۆشداری دەدات لەوەی رێژەی پاشماوە پلاستیکییەکان گەیشتووەتە ئاستێکی مەترسیدار و دەبێتە هۆی بڵاوبوونەوەی ماددەی شێرپەنجەیی، هەربۆیە حکومەت کار لەسەر بڕیارێک دەکات بۆ قەدەغەکردنی بەرهەمە پلاستیکییەکان.

لە راگەیەندراوێکی وەزارەتی ژینگەدا هاتووە، عیراق بەدەست بەرزیی رێژەی پاشماوەکانەوە دەناڵێنێت و سیستمی جیاکردنەوە و ریسایکلینی نییە، بەجۆرێک رێژەی پاشماوەی پلاستیکی 40%ی کۆی پاشماوەکان پێکدەهێنێت، ئەمەش وایکردووە بەشێوەیەکی کراوە بسووتێنرێن و ماددەی "دیۆکسین"ی شێرپەنجەیی لێ دەربچێت.

راشیگەیاندووە: پێویستە خۆراک و ئاو و یاریی منداڵان لە مادە پلاستیکییەکان بپارێزرێن، چونکە سەرەڕای ئەوەی عیراق وڵاتێکی نەوتییە، بەڵام پیشەسازیی پترۆکیمیایی لاوازە و زۆربەی پلاستیک هاوردە دەکرێت و تەنیا بۆ یەکجار بەکاردەهێنرێت.

وەزارەتی ژینگە ئاماژە بەوەشکردووە، لەسەر راسپاردەی سەرۆکایەتیی ئەنجومەنی وەزیران و وەزارەتی ژینگە، کار دەکرێت بۆ دەرکردنی بڕیارێک بە مەبەستی سنووردارکردنی هاوردەکردن و بەکارهێنانی پلاستیکی "یەکجار بەکارهاتوو"، لە ئێستاشدا بڕیارەکە لەسەر مێزی ئەنجومەنی وەزیرانە.

PUKMEDIA