وتەبێژی ئیدارەی خۆسەر: رێککەوتنی 10ی ئادار لەرۆژانی داهاتوودا جێبەجێدەکرێت

ئاژانسەکان

مەزڵوم عەبدی فەرماندەی گشتی هەسەدەو ئەحمەد شەرع سەرۆكی سوریا

وتەبێژێکی ئیدارەی خۆسەر رایگەیاندووە: رێککەوتنی 10ی ئادار لە رۆژانی داهاتوودا جێبەجێ دەکرێت و وابڕیارە ئەمریکاش سەرپەرشتی جێبەجێکردنی رێککەوتنەکە بکات.

مریەم ئیبراهیم وتەبێژی وەفدی ئیدارەی خۆسەر بۆ دانوستان لەگەڵ دیمەشق لە لێدوانێکدا رایگەیاندووە: مەزڵوم عەبدی فەرماندەی هێزەکانی سوریای دیموکرات (هەسەدە)، لەماوەی 10 رۆژی داهاتوودا دەچێتە دیمەشق و رێککەوتنی 10ی ئادار لە رۆژانی داهاتوودا جێبەجێ دەکرێت.

وتیشی: هێزەکانی سوریای دیموکرات پارێزگاری لە ناوچەکانی باکوور و رۆژهەڵاتی سوریا دەکەن و سوپای سوریا ناچنە ئەو ناوچانە.

ئەوەش دەڵێت: ئیدارەی خۆسەر پابەند دەبێت بە چارەسەری سیاسی و كاركردن بۆ سەرخستنی رێككەوتنی 10ی ئادار، کەلەنێوان ئەحمەد شەرع و مەزڵوم عەبدی کراوە

لەلایەکی تریشەوە یاسر سلێمان وتەبێژی وەفدی ئیدارەی خۆسەر بۆ دانوستان لەگەڵ دیمەشق رایگەیاندووە: بڕیارە لەچەند رۆژی داهاتوودا رێكەوتنی 10ی ئادار لەگەڵ دیمەشق بچێتە بواری جێبەجێكردن، ئەمریكاش لەسەر داوای ئەحمەد شەرع ئامادەیە سەرپەرشتی جێبەجێكردنی رێكەوتنەكە بكات.

لە رۆژی 10-3-2025 مەزڵوم عەبدی فەرماندەی گشتی هەسەدەو ئەحمەد شەرع سەرۆكی سوریا كۆبوونەوەو رێككەوتنێكیان ئیمزا كرد، کەتێیدا ئاگربەست لە تەواوی خاكی سووریا رادەگەیندرێت و گرەنتی مافی سوورییەكان لە بەشداریكردنیان لەپڕۆسەی سیاسی دەكرێت، هەر بەپێی رێككەوتنەكە، كورد پێكهاتەیەكی سەرەكی سووریایەو مافەكانی گرەنتی دەكرێت، هاوكات دامەزراوە مەدەنی و سەربازییەكانی باكور و رۆژهەڵاتی سوریا تێكەڵی ئیدارەی دەوڵەتی سوریا دەكرێن، لەوانە هێزەكانی هەسەدەو دەروازە سنوورییەكان و فڕۆكەخانەو كێڵگە نەوتی و گازییەكان، لە خاڵێكی تریشدا هاتووە، بانگەوازی دابەشبوون و وتاری رق رەت دەكرێتەوەو پێویستە هەموو لایەن پاڵپشتی لە دەوڵەتی سوریا بكەن لە كاتی هەر هەڕەشەیەك.

PUKMEDIA