لقی سلێمانی سەندیكای رۆژنامەنووسان: رێكخراوێك درۆ بەناوی سلێمانیەوە دەكات

راگەیاندنى لقی سلێمانی سەندیكای رۆژنامەنووسانی كوردستان

بیناى لقی سلێمانی سەندیكای رۆژنامەنووسانی كوردستان

لقی سلێمانی سەندیكای رۆژنامەنووسانی كوردستان سەبارەت بە راپۆرتێکى رێكخراوى "كۆمەڵەی بەرگری لە رۆژنامەنووسى" پەیامێکى بڵاوکردەوە و رایگەیاند: ناوی سلێمانی هێناوە گوایە زۆرترین پێشێلكاریی تێدا تۆماركراوە، لەکاتێکدا ئەم رێكخراوە نوێنەریان لە كوردستاندا نییە، بۆیە ئێمە لە لقی سلێمانی سەندیكای رۆژنامەنووسانی كوردستان نیگەران بووین بەشێواندنی راستیەكان و وێناكردنی نێگەتیڤانەی ژینگەی میدیایی لە كوردستاندا بە وەرگرتنی زانیاریی لە زاری كەسان و سەرچاوەی نەناسراوەوە، ئێمە ئێستا لەبەردەم بژاردەی تۆماركردنی سكاڵای رەسمین لەدادگای تایبەت بە رۆژنامەنووسان.

دەقى پەیامەکە:

رێكخراوێك درۆ بەناوی سلێمانیەوە دەكات

جمعية الدفاع عن الصحافة وكبوة حصان

رێكخراوێك بەناوی (كۆمەڵەی بەرگری لە رۆژنامەنووسى) كە زاراوەی پێشێلكاریی نەناساندوە، لە راپۆرتێكدا ناوی سلێمانی هێناوە گوایە زۆرترین پێشێلكاریی تێدا تۆماركراوە، لەكاتێكدا زاراوەی پێشێلكاریی لای ئەم رێكخراوە رون و ئاشكرا نییە و بانگهێشتكردنی دادگا بە پێشێلكاریی داناوە، سەرچاوەكانی ئەم ئامارەش نەوتراوە لەكوێوە وەرگیراون، چونكە ئەم رێكخراوە نوێنەریان لە كوردستاندا نییە، رەنگە بەشێوازی كۆپی پێست ئەم ژمارانەیان تۆماركردبێت.

بۆیە ئێمە لە لقی سلێمانی سەندیكای رۆژنامەنووسانی كوردستان نیگەران بووین بەشێواندنی راستیەكان و وێناكردنی نێگەتیڤانەی ژینگەی میدیایی لە كوردستاندا بە وەرگرتنی زانیاریی لەزاری كەسان و سەرچاوەی نەناسراوەوە، هاوكات دەتوانرا ئامارەكانی لیژنەی داكۆكی لە مافی رۆژنامەنووسان وەربگیرایە یان پرسیارێكیان لە لقی سلێمانی سەندیكاكە بكردایە، بۆ ئەوەی نەكەونە هەڵەی وا زەق و گومان لەسەر مەبەست و راستگۆیی رێكخراوەكەیان دروست نەبوایە.

ئێمە ئێستا لەبەردەم بژاردەی تۆماركردنی سكاڵای رەسمین لەدادگای تایبەت بە رۆژنامەنووسان لە شاری سلێمانی و لە شاری بەغداد لەسەر رێكخراوەكە و بەرێوەبەرانیان كە وەڵامی پەیوەندیی تەلەفۆنەكانیان نادەنەوە، تا بزانین ئەم سەرسمەی داویانە هۆكارەكەی چی بو.

لقی سلێمانی
سەندیكای رۆژنامەنووسانی كوردستان

3/1/2026

PUKMEDIA