سەنتەری شارەکان لەچاوەڕوانی دابەشکردنی نەوتدان

راگەیاندنی نەوت و کانزاکانی سلێمانی

پرۆسەی دابەشکردنی نەوت

وتەبێژی نەوت و کانزاکانی سلێمانی رایدەگەیەنێت: نەوتی پێویستمان بۆ دابەشکردن بەسەر سەنتەری شارەکاندا لەبەردەستدا نییە و چاوەڕێی گەیشتنی بڕی پێویستین، وتیشی: بڕیارە حکومەتی عیراق بڕی 20 ملیۆن لیتر نەوت بۆ پارێزگاکان بنێرێت و لەگەڵ گەیشتنیشیدا دەست بەدابەشكردنی دەکەین.

سەلام عومەر وتەبێژی نەوت و کانزاکانی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: تائێستا زیاتر لە 61 ملیۆن لیتر نەوت بەسەر هاووڵاتیانی ناوچە شاخاوییەکانی دەرەوەی شار و پارێزگای هەڵەبجەدا دابەشکراوە، بەڵام نەوتی پێویستمان بۆ دابەشکردن بەسەر سەنتەری شارەکاندا لەبەردەستدا نییە و چاوەڕێی گەیشتنی بڕی پێویستین.

راشیگەیاند: دواکەوتنەکە هەر لە سلێمانی نییە، بەڵکو لە هەولێر و دهۆکیش نەوت دابەشنەکراوە، هاوکات لە مانگی 12ی ساڵی رابردووەوە نووسراومان ئاڕاستەی وەزارەتی سامانە سروشتییەکان کردووە بۆ تەرخانکردنی نەوت بەسەر سەنتەری شارەکاندا، بەڵام تاوەکو ئێستا وەڵام نەدراوینەتەوە، هەرچەندە بڕیارە حکومەتی عیراق بڕی 20 ملیۆن لیتر نەوت بۆ پارێزگاکان بنێرێت و لەگەڵ گەیشتنیشیدا دەست بەدابەشكردنی دەکەین.

ئەمەش لەکاتێکدایە، هەر بەرمیلێک نەوت کە دەکاتە(200) لیتر، بە نرخی 104 هەزار دەدرێت بە هاووڵاتیان و لەمساڵدا پرۆسەی دابەشکردن لە ناوچەکانی دەرەوەی سەنتەری پارێزگای سلێمانی و هەڵەبجە بەردەوام بووە و بەهۆیەوە 305 هەزار و 405 خێزان لەو ناوچانە سوودمەند بوون و 61 ملیۆن لیتر نەوت دابەشکراوە.

PUKMEDIA