فەرماندەی گشتیی هەسەدە: بۆ راگرتنی هێرشەكان كاردەكەین

PUKMEDIA

مەزڵوم عەبدى فەرماندەی گشتیی هەسەدە

فەرماندەی گشتیی هەسەدە، لەبارەی هێرشەكانی سەر گەڕەكە كوردنیشنەكانی حەلەب پەیامێكی بڵاوكردەوە و رایگەیاند: ئێمە لەكاتێكدا لەپاڵ خەڵكەكەمان لە شێخ مەقسود و ئەشرەفییە دەوەستین، ماوەی چەند رۆژێكیشە لەگەڵ هەموو لایەنەكان بۆ راگرتنی هێرشەكان كاردەكەین.

مەزڵوم عەبدی، فەرماندەی گشتیی هێزەكانی سوریای دیموكرات (هەسەدە)، لەبارەی هێرشەكانی سەر گەڕەكە كوردنیشنەكانی حەلەب پەیامێكی بڵاوكردەوە و رایگەیاند: بەردەوامبوونی نەهجی شەڕ و زمانی جەنگ بۆ سەپاندنی چارەسەری تاكلایەنە، قبوڵكراو نییە و پێشتریش بووەتە كۆمەڵكوژی كە گەیشتووەتە ئاستی تاوانی جەنگ لە ساحلی سوریا و سوەیدا.

روونیشیکردەوە: بڵاوكردنەوەی تانك و تۆپ لە گەڕەكەكانی شاری حەلەب و بۆردومانكردنی هاووڵاتییانی مەدەنی و كۆچپێكردنیان و هەوڵی چوونە ناو گەڕەكە كوردییەكان لەكاتی پڕۆسەی دانوستان، دەرفەتی گەیشتن بە لێكتێگەیشتن لەبار دەبات و دۆخێك دەڕەخسێنێت بۆ گۆڕینی دیمۆگرافیی مەترسیدار، هاووڵاتییە گیرخواردووەكانیش لەو دوو گەڕەكە دەخاتە بەردەم مەترسی كۆمەڵكوژی.

 ئاماژەیبەوەشدا: ئێمە لەكاتێكدا لەپاڵ خەڵكەكەمان لە شێخ مەقسود و ئەشرەفییە دەوەستین، ماوەی چەند رۆژێكیشە لەگەڵ هەموو لایەنەكان كاردەكەین بۆ راگرتنی هێرشەكان.

ئەوەشى خستەڕوو: سەرەخۆشی لە كەسوكاری شەهیدان دەكەین و هیوای چاكبوونەوەش بۆ بریندارەكان دەخوازین.

PUKMEDIA