مەزڵوم عەبدی: گەیشتوینەتە لێکتێگەیشتنێک بۆ ئاگربەست لە حەلەب

PUKMEDIA

مەزڵوم عەبدی

هێزەکانی سوریای دیموکرات رایانگەیاند: دوای چەند رۆژێک لە روبەڕوبونەوە لەگەڵ هێزەکانی حکومەتی سوریا هێزە چەکدارەکانیان لە گەڕەکەکانی ئەشرەفییە و شێخ مەقسود لەحەلەب کشاندۆتەوە.

لەو بارەیەشەوە مەزڵوم عەبدی فەرماندەی هێزەکانی سوریای دیموکرات لە تۆڕی کۆمەڵایەتی ئێکس رایگەیاندووە: لەئەنجامی نێوەندگیری نێودەوڵەتی بۆ وەستاندنی شەڕ لە حەلەب دژی کەسوکارمان، گەیشتینە لێکتێگەیشتن بۆ راگرتنی تەقە و دەرهێنانی بریندار و شەهید و هاووڵاتیانی مەدەنی و شەڕڤانەکان لەهەردوو گەڕەکی ئەشرەفییە و شێخ مەقسود.

وتیشی: داوا لە نێوەندگیران دەکەین پابەندبن بە بەڵێنەکانیانەوە بۆ ڕاگرتنی پێشێلکارییەکان و کار بکەن بۆ گەڕانەوەی ئاوارەکان بە سەلامەتی بۆ سەر ماڵ و حاڵی خۆیان.

ئاماژەی بەوەشکرد: سوپاسی خۆڕاگری هاووڵاتیان دەکەین لە شێخ مەقسود و ئەشرەفیە و پرسە و سەرەخۆشی خۆشمان ئاڕاستەی کەسوکاری شەهیدان و گەلەکەمان دەکەین و دوعای زوو چاکبوونەوەش بۆ بریندارەکان دەکەین.

PUKMEDIA