عیراق.. له‌یه‌ك مانگدا نزیكه‌ی 5 هه‌زار جیابوونه‌وه‌ی هاوسه‌رگیری تۆماركراوه‌

Pinterest

جیابوونەوە

ئه‌نجومه‌نی باڵای دادوه‌ری عیراق ئاماری هاوسه‌رگیری و جیابوونه‌وه‌ی له‌ماوه‌ی یه‌ك مانگدا راگه‌یاند، كه‌ نزیكه‌ی 5 هه‌زار هاوسه‌ر جیابوونه‌ته‌وه‌.

به‌پێی راگه‌یه‌ندراوێكی ئه‌نجومه‌نی باڵای دادوه‌ری و پێداچوونه‌وه‌ی عیراق كه‌ كۆپیه‌كی بۆ  PUKMEDIA نێدراوه‌ ئاماژه‌ بۆ ئه‌وه‌كراوه‌، "كۆی گشتی گرێبه‌ستی هاوسه‌رگیری بۆ مانگی 12ی ساڵی رابردوو گه‌یشتووه‌ته‌ 27 هه‌زار، هاوكات ژماره‌ی جیابوونه‌وه‌ی هاوسه‌رگیری گه‌یشتووه‌ته‌ چوار هه‌زار و 888، حاڵه‌ت له‌ سه‌رانسه‌ری پارێزگاكانی عیراق جگه‌ له‌هه‌رێمی كوردستان.

له‌ ڕ‌اگه‌یه‌ندراوه‌كه‌دا ئاماژه‌ به‌وه‌شكراوه‌، "به‌غدا له‌ پله‌ی یه‌كه‌می لیستی گرێبه‌ستی هاوسه‌رگیری و جیابوونه‌وه‌دا به‌ركه‌وتووه‌، به‌شێوه‌یه‌ك دادگای تێهه‌ڵچوونه‌وه‌ی به‌غدا/ ره‌سافە، چوار هه‌زار و 112 گرێبه‌ستی هاوسه‌رگیری و 798 حاڵه‌تی جیابوونه‌وه‌ تۆماركراوه‌، هه‌روه‌ها له‌دادگای تێهه‌ڵچوونه‌وه‌ی به‌غدا/ كه‌رخیش، 3 هه‌زار و 237 گرێبه‌ستی هاوسه‌رگیری و 692 جیابوونه‌وه‌ تۆماركراوه‌.

ئه‌مه‌ش له‌كاتێكدایه‌، دادگای تێهه‌ڵچوونه‌وه‌ی نه‌ینه‌وا به‌ پله‌ی دووه‌م دێت له‌ عیراق كه‌، سێ هه‌زار و 64 حاڵه‌تی هاوسه‌رگیری و 530 حاڵه‌تی جیابوونه‌وه‌ تۆمار كراوه‌.

PUKMEDIA