هەسەدە 26 زیندان بەڕێوەدەبات کە 12 هەزار داعشی تێدایە

PUKMEDIA

زیندان

لە راپۆرتێکدا چەندین زانیاری لەبارەی ئەو زیندانانە دەخرێتە روو کەلەلایەن هێزەکانی سوریای دیموکراتەوە بەڕێوەدەبرێن، کە زیاتر لە ١٢ هەزار چەکداری داعشیان تێدایە و نزیکەی سێ هەزاریشیان زیندانی بیانین.

وەک لە راپۆرتەکەدا هاتووە: هەسەدە سیستمێکی فراوانی گرتووخانە بەڕێوەدەبات، کە (٢٦) زیندان لەخۆدەگرێت و لەژێر کۆنترۆڵی خۆیدایە، تیایاندا (١٢) هەزار زیندانیی چەکدارانی داعش دەستبەسەر کراون، کە لەنێوانیاندا (٢٥٠٠ بۆ ٣٠٠٠) زیندانییان بیانین و خەڵکی (٥٤) دەوڵەتی جیاوازن و بەسەر (٧) زینداندا دابەشکراون.

ئەوەش هاتووە: گەورەترینیان زیندانی (غوێران)ە لە حەسەکە، کە (٥٠٠٠) دەستبەسەرکراوی تێدایە، هەروەها زیندانی شەدادی لە حەسەکە، جەرکین لە قامیشلۆ، زیندانی دێریک لە مالیکییە و زیندانی کامپی ڕۆژ، جگە لە ناوەندەکانی دەستبەسەرکردن لە ڕەقە و دێرەزوور و دوو زیندان لە ناو هەردوو کامپی هۆڵ و ڕۆژدا.

ئاماژە بەوەش کراوە: مەلەفی زیندانەکانی هەسەدە بەو قەبارە و ژمارە زۆرانەوە، جارێکی دیکە داعش، وەک هەڕەشەیەکی بەردەوام و کۆتایی پێنەهاتوو نیشان دەداتەوە بەتایبەت، کە ڕژێمی دڕندە و تیرۆریستی دیمەشق بە ڕاستەوخۆ و بەناڕاستەوخۆش پەلاماری زیندانەکان دەدات و پشێوی دەنێتەوە و دەیەوێت ئازادیان بکات، ئەمە بێجگە لە کەمتەرخەمی زۆری ئەمەریکا و هاوپەیمانان لە جێبەجێکردنی ئەرکەکانی سەرشەنیان بەرامبەر بەو دۆسییە مەترسیدارە. هەموو ئەمانەش ترسەکان لەگەڕانەوەی ڕێکخراوەکە بۆ پێشەوەی ڕووداوەکان زیاتر دەکات.

ئەوەش راگەیەندراوە: پەلاماری ڕژێمی سوریا بۆ سەر هەسەدە ڕەنگە ببێتەهۆی دزەکردنی توخمە تیرۆریستییەکان لە سنوورەکانەوە و چالاکبوونەوەی شانە نووستووەکان لە ناوخۆی عیراق و ناوچەکە، پێویستە لەسەر بەغداد ئاستی هۆشداریی مەترسییەکان لەسەر سنوورە ڕۆژئاواییەکان بۆ بەرزترین پلە بەرزبکاتەوە، باری نائاسایی هەواڵگری ڕابگەیەنێت و هەماهەنگییە هەرێمی و نێودەوڵەتییەکان کارا بکات، چونکە ئەو دۆسیەیە مەترسییەکی بەردەوامە لەسەر ئاسایش لە ناوچەکەدا.

PUKMEDIA