رێگریی لە تیمێکی راگەیاندنی یەکێتی دەکرێت بچنە رۆژئاڤا

ئەرشیف

دەروازە سێمێلکا

ناوەندی بادینانی راگەیاندنی یەکێتیی نیشتمانیی کوردستان، لەبەرامبەر رێگریکردن لە تیمێکی راگەیاندنیان، کە دەیانویست بۆ روماڵی بەرخودانی رۆژئاڤا لەسنور بپەڕنەوە پەیامێکی بڵاوکردەوە و رایگەیاند: لەکاتێکدا هەموو گەلی کوردستان بەیەک ئیرادە داوای یەکڕیزی و تەبایی و پشتگیریکردنی رۆژئاڤای کوردستان دەکەن و خۆیان ئامادە دەکەن بۆ هەر پێشهات و ئەگەرێکی نەخوازراو، بەڵام هەر رۆژە و بەبیانوویەک ئیدارەی دهۆک رێگری لەو تیمە دەکەن.

دەقی پەیامەکە:
ماوەی پێنج رۆژە، ناوەندی بادینانی راگەیاندنی یەكێتی بەشێوەیەكی رەسمی داوای لەبەرپرسانی ئیدارەی دهۆك كردووە، كە رێگە بە تیمێکی ناوەندی راگەیاندنی بادینانی یەکێتی بدات، تاوەکو بۆ روماڵی رووداو و بەرخودانی كوردانی رۆژئاڤا لە سنوور بپەڕنەوە، بەڵام هەر رۆژە و  بیانویەك دەهێننەوە.

ئەمە لەکاتێکدایە کە هەموو گەلی کوردستان بەیەک ئیرادە داوای یەکڕیزی و تەبایی و پشتگیریکردنی رۆژئاڤای کوردستان دەکەن و خۆیان ئامادە دەکەن بۆ هەر پێشهات و ئەگەرێکی نەخوازراو، بۆیە لەسەر ئەم هەڵوێستەی ئیدارەی دهۆک پرسیارێکی جددی و لۆژیكی دەکەین ‌و دەڵێین ئەم رەفتارو هەڵوێستەتان لەم قوناغ و کەشە هەستیار و دژوارەدا خزمەت بە چ لایەنێک دەکات؟ خزمەتی بەرژەوەندییە باڵاکانی گەلی  کوردستان دەکات یان خزمەت بەناحەزانی گەلی کوردستان؟ وەڵام بۆ خەڵکی کوردستان بەجێدەهێڵین .

ناوەندی بادینانی راگەیاندنی یەکێتیی نیشتمانیی کوردستان

PUKMEDIA