شه‌رع و ناتانیاهۆ به‌نێوه‌ندگیری تره‌مپ كۆده‌بنه‌وه‌

ئاژانسی هەواڵی ئاسیا

ئاڵای سوریا و ئیسرائیل

چاوەڕوان دەكرێت لێپرسراوانی سوریاو ئیسرائیل بە نێوەندگیری ئەمریكادا كۆببنەوە، بۆ كۆتاییهێنان بەڕ‌ێككەوتنی ئەمنی نێوان هەردوو وڵات.

سەرچاوەیەكی نزیك لە ئەحمەد شەرع، سەرۆكی كاتی سوریا بە i24NEWS ی ڕاگەیاندووە، بڕ‌یارە بەم زووانە بەرپرسانی سوریا و ئیسرائیل بەنێوەندگیری ئەمریكادا كۆببنەوە، كەپێدەچێت كۆبوونەوەكە لەپاریس بەڕێوەبچێت.

بەگوێرەی سەرچاوە سوورییەكە، دانوستانەكان لەسەر پڕ‌ۆژەی ستراتیژی و ئابووری هاوبەشی جۆراوجۆری نێوان هەردوو وڵاتدا دەبێت، هەروەها لەكۆبوونەوەكەدا پرسی كردنەوەی باڵیۆزخانەی ئیسرائیل لەدیمەشق پێش كۆتایی ئەمساڵ تاوتوێ دەكرێت.

بەپێی وتەی سەرچاوەكە بۆ i24NEWS ی ئیسرائیلی: یەكێكی دیكە لەو بژاردانەی باسی لێ دەكرێت، بابەتی بەكرێدانی بەرزاییەكانی جۆلانە بۆ ماوەی 25 ساڵ بە ئیسرائیل، هاوشێوەی ئەو گرێبەستەی كەپێشتر ئوردن لەگەڵ ئیسرائیل ئیمزای كردبوو لەسەر ناوچە سنوورییەكان.

بۆ ئەمەش دۆناڵد ترەمپ سەرۆكی ئەمریكا هەوڵدەدات لەزووترین كاتدا ئەحمەد شەرع سەرۆكی كاتی سووریاو بنیامین ناتانیاهۆ سەرۆكوەزیرانی ئیسرائیل كۆبكاتەوە بۆ مەراسیمی ئیمزاكردنی رێككەوتنی ئاشتی لەنێوانیاندا.

PUKMEDIA