وەزارەتی نەوت: داهاتی مانگی رابردوو زیاتر لە شەش ملیار دۆلار بووە

میدیاکان

هەناردەی نەوت

وەزارەتی نەوتی عیراق ئاشکرای کرد داهاتی فرۆشی نەوت لە مانگی رابردوودا زیاتر لە شەش ملیار دۆلار بووە و هەرێمی کوردستانیش زیاتر لە پێنج ملیۆن بەرمیل نەوتی هەناردە کردووە.

وەزارەتی نەوت لە راگەیەندراوێکیدا ئاشکرای کردووە: کۆی هەناردە و داهاتی نەوت بۆ مانگی 12 ساڵی 2025، بەپێی ئامارەکانی کۆمپانیای بەبازاڕکردنی نەوتی عیراق ناسراو بە سۆمۆ، بڕی107 ملیۆن و 651 هەزار و 61 بەرمیل بووە، کە داهاتەکەی بریتی بووە لە 6 ملیار و 388 ملیۆن و 429 هەزار دۆلار.

 هەر بەپێی راگەیەندراوەکەی وەزارەتی نەوت، کۆی گشتی بڕی هەناردەکراوی نەوتی خاو لە مانگی رابردوودا لە کێڵگە نەوتییەکانی ناوەڕاست و باشووری عیراق، بڕی 100ملیۆن و 420 هەزار و 48 بەرمیل بووە.

هاوکات بڕی هەناردەی نەوتی هەرێمی کوردستان لە ڕێگەی بەندەری جەیهانی تورکیاوە، بریتی بووە لە 5 ملیۆن و 997 هەزار و 527 بەرمیل.

 وەزارەتی نەوتی عیراق لە کۆتایدا رایگەیاندووە:  بڕی هەناردەی نەوت بۆ ئوردن، 309 هەزار و 712 بەرمیل بووە، لە کاتێکدا بڕی هەناردەکراو لە کێڵگەی گەیارە 923 هەزار و 774 بەرمیل بووە.

PUKMEDIA