نرخى 100 دۆلار 156 هەزار دینارى عیراقى تێپەڕاند

DAWN

دۆلارى ئەمریکى

ماوەى چەند رۆژێکە نرخى دۆلار بەرامبەر بە دینارى عیراقى ناجێگیرى بەخۆوە بینیوە و رۆژ بە رۆژ نرخى دۆلار بەرزتر دەبێتەوە، کە لە ئەمڕۆدا نرخى 100دۆلارى ئەمریکى گەیشتوەتە زیاتر لە 156هەزار دینارى عیراقى، ئەندامێکى ئەنجومەنى بازاڕى دراویش لە سلێمانى دەڵێت: بارودۆخى سیاسى هۆکارە بۆ بەرزبوونەوەى نرخى دۆلار.

لوقمان حەسەن ئەندامى ئەنجومەنى بازاڕى شەوکەتى مەلا کە تایبەتە بە ئاڵوگۆڕى دراو بۆ  PUKMEDIA  رایگەیاند: نرخى دۆلار لە بانکى مەرکەزى عیراقى جێگیرە و هیچ گۆڕانکارییەکى بەسەردا نەهاتووە بەڵام ناجێگیرى سیاسى ناوچەکە هۆکارە بۆ بەرزبوونەوەى نرخى دۆلارى ئەمریکى بەرامبەر بە دینارى عیراقى.

راشیگەیاند: بەهۆى ناسەقامگیرى سیاسییەوە خەڵک دۆلار لە بازاڕدا دەکڕن، بەمەش خواست لەسەر دۆلار زیاد بووە و کاریگەرى کردوەتە سەر نرخەکەى و بەرزى کردووەتەوە، هەرچەندە ئەگەر بارودۆخى سیاسى ناوچەکە بەم شێوەیە بمێنێتەوە چاوەڕوان دەکرێت، نرخى دۆلار زیاتر بەرزبێتەوە.

ئەو ئەندامەى ئەنجومەونى بازاڕى شەوکەتى مەلا، راشیگەیاند: ناسەقامگیرى ناوچەکە تەنها کاریگەرى نەکردووەتە سەر دینارى عیراقى بەڵکو نرخى تمەنى ئێرانیشى دابەزاندووە و لە ئەمڕۆدا نرخى 100 دۆلار بەرامبەر بە زیاتر لە 14 ملیۆن تمەنە، کە ئەمەش بۆ یەکەمینجارە دۆلار بەرامبەر تمەن ئەوە نرخە پێوانەیە تۆمار بکات.

بانکى مەرکەزى عیراقى بەردەوام رێکارى نوێ دەگرێتەبەر بۆ جێگیرکردنى نرخى دۆلار بەرامبەر بە دینارى عیراقى، بەڵام لەگەڵ تێکچوونى بارودۆخى سیاسى و ئەمنى، عیراق و ناوچەکە راستەوخۆ لە بازاڕەکاندا خواست لەسەر دۆلار زیاد دەکات و بە بێ خواستى بانکى مەرکەزى نرخى دۆلار راستەوخۆ بەرزدەبێتەوە، هەرکاتێکیش بارودۆخى سیاسى و ئەمنى ناوچەکە ئاسایى دەبێتەوە نرخى دۆلاریش جێگیر دەبێت.

PUKMEDIA