حكومه‌تی هه‌رێم سێ لیستی مووچه‌ی لای به‌غداده‌

PUKMEDIA

دراوی عیراقی

ئه‌مڕ‌ۆ چوارشه‌ممه‌ 28ی1ی2026 لیستی مووچه‌ی مانگی یه‌كی مووچه‌خۆرانی هه‌رێم راده‌ستی فه‌رمانگه‌ی ژمێریاری وه‌زاره‌تی دارایی حكومه‌تی فیدراڵ ده‌كرێت، به‌مه‌ش حكومه‌تی هه‌رێمی كوردستان سێ لیستی مووچه‌ی بۆ به‌غداد ناردووه‌، به‌ڵام تائێستا دابه‌شكردنی مووچه‌ی مانگه‌كانی 11 و 12 ی ساڵی رابردوو به‌ نادیاری ماوه‌نه‌ته‌وه‌، له‌كاتێكدا ئه‌و مووچه‌یه‌ی له‌ هه‌فته‌ی داهاتوودا دابه‌شده‌كرێت مووچه‌ی مانگی یه‌كی ئه‌مساڵه‌.

رۆژی سێشه‌ممه‌، 27ی كانوونی دووه‌می 2026، وه‌زاره‌تی دارایی و ئابووری هه‌رێمی كوردستان لیستی مووچه‌ی مانگی یه‌كی فه‌رمانبه‌رانی ره‌وانه‌ی به‌غداد كرد، وابڕ‌یاریشه‌ ئه‌مڕ‌ۆ لیسته‌كه‌ راده‌ستی فه‌رمانگه‌ی ژمێریاری وه‌زاره‌تی دارایی حكومه‌تی فیدراڵ بكرێت، ئه‌م هه‌نگاوه‌ له‌ كاتێكدایه‌ كه‌ هێشتا مووچه‌ی مانگی یه‌كی ئه‌مساڵ له‌ عیراقیش دابه‌شنه‌كراوه‌ و سه‌رچاوه‌كان هۆكاره‌كه‌ی بۆ وردبینیی سه‌ره‌تای ساڵ و داخستنی هه‌ژماره‌ داراییه‌كانی ساڵی 2025 ده‌گێڕ‌نه‌وه‌.

سه‌رچاوه‌یه‌ك له‌ وه‌زاره‌تی دارایی عیراق بۆ PUKMEDIA  وتی: هه‌ر كاتێك عیراق مووچه‌ بۆ هه‌رێم بنێرێت، مووچه‌ی مانگی یه‌كی ئه‌مساڵ ده‌بێت، ئه‌مه‌ش له‌ كاتێكدایه‌ مووچه‌ی مانگه‌كانی 11 و 12 ی ساڵی رابردوو چاره‌نوسیان هێشتا نادیاره‌.

هاوكات رۆژی 28ی 12ی 2025 وه‌زاره‌تی دارایی هه‌رێم، لیستی مووچه‌ی مانگی 10 ی بڵاوكرده‌وه‌ و به‌پێی خشته‌كه‌ له‌ماوه‌ی سێ رۆژدا هه‌موو مووچه‌خۆرانی هه‌رێمی كوردستان مووچه‌یان وه‌رگرت، حكومه‌تی عیراقیش جه‌خت ده‌كاته‌وه‌، كه‌ ته‌نها پابه‌نده‌ به‌ ناردنی مووچه‌كانی ساڵی 2026 و پێویسته‌ حكومه‌تی هه‌رێم خۆی به‌رپرسیارێتی مووچه‌ فه‌وتاوه‌كانی ساڵی رابردوو هه‌ڵبگرێت.

ئه‌مه‌ش له‌كاتێكدایه‌، ساڵی 2024 یش یه‌ك مووچه‌ی مووچه‌خۆرانی هه‌رێمی كوردستان دابه‌شنه‌كرا و حكومه‌تی هه‌رێمی كوردستانیش هیچ روونكردنه‌وه‌یه‌كی له‌سه‌ر ئه‌و مووچه‌یه‌ش بڵاونه‌كرده‌وه‌ كه‌ ئایا پاشكه‌وت كراوه‌ یان چاره‌نوسی چی لێهاتووه‌.

PUKMEDIA