هەسەدە و حکومەتى کاتى سوریا رێککەوتن

PUKMEDIA

ئاڵاى هەسەدە و حکومەتى کاتى سوریا

ئەمڕۆ هەینی 30ی کانوونی دووەمی 2026، هێزەکانی سووریای دیموکرات (هەسەدە) ناوەڕۆکی رێککەوتنێکیان لەگەڵ حکومەتی کاتى سوریا ئاشکرا کرد، کە لەگەڵ سوپای سوریادا گەیشتونەتە رێککەوتن و قۆناغ بە قۆناغ هێزەکانیان لەگەڵ سوپای سوریادا رێکدەخرێت.

هەسەدە لە راگەیەنراوێکدا روونیکردوەتەوە، کە لەگەڵ سوپای سوریادا گەیشتونەتە رێککەوتن و قۆناغ بە قۆناغ هێزەکانیان لەگەڵ سوپای سوریادا رێکدەخرێت، هەروەها جەختیشدەکەنەوە کە رێککەوتون لەسەر یەکلاکردنەوەی مافە مەدەنی و پەروەردەییەکانی گەلی کورد و زامنکردنی گەڕانەوەی ئاوارەکان بۆ ناوچەکانیان کرا.

ئاماژەی بە ئەوە کردووە، رێککەوتنەکە بریتییە لە کشانەوەی هێزە سەربازییەکانی هەردوولا لە خاڵەکانی بەرکەوتن و  هاتنە ناوەوەی هێزە ئەمنییەکانی سەر بە وەزارەتی ناوخۆ بۆ ناو سەنتەری شارەکانی حەسەکە و قامیشلۆ و دەستپێکردنی یەکخستنی هێزە ئەمنییەکان لە ناوچەکە، هەروەها پێکهێنانی فیرقەیەکی سەربازی کە لە سێ لیوا پێکهاتووە لە هێزەکانی  سوریای دیموکرات، جگە لە پێکهێنانی لیوایەک لە هێزەکانی کۆبانی لە چوارچێوەی فیرقەیەکی سەر بە هێزەکانی کۆبانێ لەگەڵ پارێزگای حەلەب.

لە بەشیکی دیکەی رێککەوتنەکەدا باس لە یەکخستنی دامەزراوەکانی ئیدارەی خۆسەر کە سەر بە دامەزراوەکانی دەوڵەتی سوریا دەبێت و لەگەڵ رێکخستنەوەی فەرمانبەرانی حکومی دەکات.

لە راگەیێنراوەکەی هەسەدەدا باس لەوەش کراوە، کە ئامانج لەو رێککەوتنە یەکخستنی خاکی سوریا و جێبەجێکردنی پڕۆسەی تێکەڵکردنی تەواوەتییە لە ناوچەکە، لە رێگەی بەهێزکردنی هاوکاری لەنێوان لایەنە پەیوەندیدارەکان و یەکخستنی هەوڵەکان بۆ بونیاتنانەوەی وڵات.

PUKMEDIA