کاروان ئەنوەر: کەناڵی NRT لە سلێمانی و هەڵەبجە و گەرمیان و راپەڕین بەردەوامدەبێت

PUKMEDIA

کاروان ئەنوەر سکرتێری لقی سلێمانی سەندیکای رۆژنامەنووسانی کوردستان

سکرتێری لقی سلێمانی سەندیکای رۆژنامەنووسانی کوردستان رایدەگەیەنێت:بڕیاری داخستنی نووسینگەکانی کەناڵی NRT لە سلێمانی و هەڵەبجە و گەرمیان و راپەڕین جێبەجێناکرێت، دەشڵێت: ئەم بڕیارە بەبێ پرسکردن بە سەندیکای رۆژنامەنووسان و وەزارەتی رۆشنبیری، دەرکراوە و جێبەجێکراوە.

کاروان ئەنوەر سکرتێری لقی سلێمانی سەندیکای رۆژنامەنووسانی کوردستان بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: داخستنی نووسینگەکانی کەناڵی NRT لە هەولێر و دهۆک، لەکاتێکدایە کە هەموو میدیا کوردییەکان بە یەک دەنگ پاڵپشتی لە بابەتێکی نەتەوەیی دەکەن، نیگەرانییەکی گەورە دروستدەکات.

راشیگەیاند: ئەم بڕیارە بەبێ پرسکردن بە سەندیکای رۆژنامەنووسان و وەزارەتی رۆشنبیری، دەرکراوە و جێبەجێکراوە، هاوکات ئەو یاسایەی ئەوان پشتیان پێ بەستووە بەرکار نین و  بڕیاری راگرتنی هەر میدیایەک دەبێت بەگوێرەی پڕەنسیپ و یاساکانی وەزارەتی رۆشنبیریی هەرێمی کوردستان بێت.

کاروان ئەنوەر ئاماژەی بەوەشکرد: بڕیاری داخستنی نووسینگەی کەناڵی NRT لە هەولێر و دهۆک جێبەجێکراوە، بەڵام لە سلێمانی و هەڵەبجە و گەرمیان و راپەڕین  جێبەجێناکرێت، تاوەکو نەچێتەوە خانەی یاسایی جێبەجێکردنەوە.

PUKMEDIA