رێگە قاچاخەکان لەکەرکوک دادەخرێن

PUKMEDIA

کەرکوک

نوسینگەی راگەیاندنی ئیدارەی کەرکوک، لەپێناو پاراستنی تەندروستی گشتی هاووڵاتیان سەرجەم ئەو توولەڕێ و رێڕەوە نایاساییانە دادەخات، کە بۆ کاری قاچاخچێتی بەکاردەهێنرێن.

لەڕاگەیەنراوێکدا کە وێنەیەکی بۆ PUKMEDIA نێردراوە، نوسینگەی راگەیاندنی ئیدارەی کەرکوک  رایگەیاندووە، لە سۆنگەی بەرپرسیارێتمان بۆ پاراستنی تەندروستی گشتی هاووڵاتیان و رێگریکردن لە هاتنەژوورەوەی مەوادی ماوەبەسەرچوو و کاڵای بێ کوالێتی، ئیدارەی کەرکوک هەموو توولەڕێ و ڕێڕەوە نایاساییەکان کە بۆ کاری قاچاخچێتی بەکاردەهێنرێن دادەخات.

هەر لەڕاگەیەنراوەکەدا، هۆشداریش دەدات بە سەرجەم بازرگانان و قاچاخچییەکان لە گرتنەبەری ئەم رێگایانە یان بازرگانیکردن بەو ماددانەی کە زیان بە ئاسایشی خۆراک و دەرمان دەگەیەنن؛ توندترین سزای یاسایی بەرامبەر سەرپێچیکاران دەگیرێتەبەر بەبێ هیچ چاوپۆشییەک.

نوسینگەی راگەیاندنی ئیدارەی کەرکوک روونیشیکردەوە، پاراستنی سەلامەتی کۆمەڵگە و دابینکردنی خۆراک و دەرمانی تەندروست لە پێشینەی کارەکانمانە و رێگە نادەین بەرژەوەندی هاووڵاتیان ببێتە قوربانی چاوچنۆکی قاچاخچییەکان.

PUKMEDIA