هەسەدە پێشنیازێك بۆ وەزارەتی بەرگریی سووریا دەكات

PUKMEDIA

ئاڵاى هەسەدە و حکومەتى کاتى سوریا

سەركردایەتی هەسەدە پێشنیازێكی نیمچەتەواوی پێشكەش بە وەزارەتی بەرگریی سووریا كرد، كە چەندین خاڵ بۆ تەواوكردنی پڕۆسەی تێكەڵبوونەوە لەخۆدەگرێت كەبریتین لە: 

یەكەم: رادەستكردنی چوار ناوەندی ئاسایشی ناوخۆ لەحەسەكە و دوو ناوەند لە قامیشلۆ، بە مەبەستی راییكردنی مامەڵەی هاووڵاتییان.

دووەم: كارپێكردنەوەی فڕۆكەخانەی قامیشلۆ لەژێر پاسەوانیی هێزەكانی ئاسایش و بە بەڕێوەبردنی فەرمانبەرانی مەدەنیی سەر بە بەڕێوەبەرایەتیی فڕۆكەوانیی سووریا.

سێیەم: ناردنی فەرمانبەران بۆ سەرپەرشتیكردنی دەروازەی سێمالكا، لەگەڵ مانەوەی دەروازەكە لەژێر پاراستنی هێزەكانی ئاسایشدا.

چوارەم: كارپێكردنەوەی بیرەنەوتەكانی ڕمێلان لەلایەن ستافی وەزارەتی نەوتی سووریاوە، بە مەرجێك لە ڕووی ئەمنییەوە لەژێر دەسەڵاتی ئاسایشدا بمێننەوە، هەروەها تەرخانكردنی بەشێك لە بەرهەمەكە بۆ (گەشەپێدانی حەسەكە)، كە هەسەدە ئیدارەی دەكات.

پێنجەم: كشاندنەوەی هێزە سەربازییەكانی سەر بە هەسەدە بۆ عامودا، دێرك (مالیكیە)، دەرباسیە و كۆبانێ و گۆڕینیان بۆ چوار لیوا، كە لە ڕووی ئیدارییەوە سەر بە وەزارەتی بەرگریی بن و مووچەكانیان لەو وەزارەتە وەربگرن.

شەشەم: مانەوەی هێزەكانی ئاسایش لە تەواوی ئەو ناوچانەی، كە ئێستا هەسەدەی لێیە، لەوانەش حەسەكە و قامیشلۆ و گرتنەدەستی ئیدارەی ئەمنیی ئەو ناوچانە.

حەوتەم: ڕادەستكردنی لیستی ناوی ئەندامانی ئاسایش بۆ ئەوەی مووچەكانیان لەلایەن وەزارەتی ناوخۆی سووریاوە خەرجبكرێت.

هەشتەم: هەڵكردنی ئاڵاكانی سووریا لە تەواوی پارێزگاكەدا.

نۆیەم: ئەنجامدانی پڕۆسەیەكی گشتگیری ئاڵوگۆڕی دیلەكان.

دەیەم: پابەندبوونی ئەندامانی ئاسایشی ناوخۆ بە مانەوە لەناو چوارگۆشە ئەمنییەكانی حەسەكە و قامیشلۆ، بە مەرجێك هێزەكانی ئاسایش دابینكردنی تەواوی پێداویستییەكانیان لە ئەستۆبگرن.

یانزەیەم: ئەندامانی ئاسایشی ناوخۆ هیچ دەسەڵاتێكی ئەمنییان لەناو هەردوو شاری حەسەكە و قامیشلۆدا نابێت.

دوانزەیەم: دانانی بازگەی هاوبەش لە نێوان ئاسایشی ناوخۆ و هێزەكانی ئاسایش لە تەواوی گوندەواری كۆبانێ، لە كاتێكدا لیوای سەر بە هێزەكانی سووریای دیموكرات (هەسەدە) لەناو شارەكەدا بڵاودەبنەوە.

PUKMEDIA