یەک ملیۆن لیتر نەوت بەسەر خاوەن پێداویستییە تایبەتەکاندا دابەشدەکرێت

تایبەت

دابەشکردنی نەوت بەسەر خاوەن پێداویستییە تایبەتەکاندا

ئەمڕۆ پرۆسەی دابەشکردنی یەک ملیۆن لیتر نەوت بە نرخی پاڵپشتیکراو بەسەر 10 هەزار خێزانی خاوەن پێداویستی تایبەتدا دەستیپێکرد، جێگری پارێزگاری سلێمانی-ش رایگەیاند: خزمەتەکانمان بۆ خاوەن پێداویستییە تایبەتەکان بەردەوام دەبێت و هەوڵدەدەین لەمانگی پیرۆزی رەمەزانیشدا سفرە و خوانەکانیان پڕ بکەین.

شاهۆ عوسمان جێگری پارێزگاری سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: دوای ئەوەی داواکارییەکمان پێشکەشی وەزارەتی نەوتی عیراقکرد بۆ دابینکردنی بڕی یەک ملیۆن لیتر نەوت تا بەسەر خێزانە خاوەن پێداویستییە تایبەتەکاندا دابەشی بکەین، بەخۆشحاڵییەوە داواکارییەکەمان قبوڵکرا و ئەمڕۆ بڕی یەک ملیۆن لیتر نەوت بە نرخی پاڵپشتیکراو بەسەر 10 هەزار خێزانی خاوەن پێداویستی تایبەتدا دابەشدەکەین، کە بۆ هەر خێزانێک 100 لیتر نەوت دەبێت و پرۆسەکە بەردەوام دەبێت.

راشیگەیاند: خزمەتەکانمان بۆ خاوەن پێداویستییە تایبەتەکان لێرەدا کۆتایی نایەت و لەئێستادا لە مانگی پیرۆزی رەمەزان نزیکدەبینەوە، وەک پارێزگای سلێمانی هەموو هاوکارییەکی خێزانە خاوەن پێداویستییە تایبەتەکان دەکەین و داواش لە سەرمایەدارانی سلێمانی دەکەین وەک هەمیشە هاوکارمان بن، تا بتوانین سفرە و خوانی ئەو خێزانانە پڕ بکەین.

هاوکات  سامان حسێن سكرتێری یەكێتی كەمئەندامانی كوردستان لەكۆنگرەیەكی رۆژنامەوانیدا رایگەیاند: لێرەوە سوپاسی جێگری پارێزگاری سلێمانی دەکەین کە بەدەنگ داواکارییەکەمانەوە هات و نەوتی بۆ دابینکردین، هاوکات سوپاسی بەڕێوەبەرایەتی چاودێری و گەشەپێدانی کۆمەڵایەتیش دەکەم کە لەسەر ئەرکی خۆی پسووڵەی بۆ دروستکردوین.

PUKMEDIA