كەمئەندامانی سەنگەر: وەزیری دارایی قوتی منداڵەكانمانی بڕیوەو قبوڵی ناكەین

PUKMEDIA

كۆنگرەی رۆژنامەوانی كۆمەڵەی پێشمەرگە دێرینەكان و كەمئەندامانی سەنگەر

كەمئەندامانی سەنگەر لەسلێمانی تائێستا مووچەی مانگی 10ی ساڵی پاریان پێنەدراوە، لەكاتێكدا عیراق مووچەكەیانی ناردووە، بەڵام لەلایەن وەزارەتی دارایی هەرێمەوە راگیراوە، كۆمەڵەكەش لەكۆنگرەیەكی رۆژنامەوانیدا رایدەگەیەنن: هەفتەیەك مۆڵەت دەدەینە وەزیری دارایی هەرێم و بەپێچەوانەوە هەڵوێستمان جدیمان دەبێت، چونكە كوردستان لەسەر خوێنی ئێمە دروستبووەو رێگانادەین قوتی منداڵەكانمان ببڕ‌درێت.


كۆمەڵەی كەمئەندامانی سەنگەر، ئەمڕ‌ۆ 11ی 2ی  2026، لەكۆنگرەیەكی رۆژنامەوانیدا رایانگەیاند: زیاتر لەهەشت هەزار كەمئەندامی سەنگەر لەهەرێمی كوردستان مووچەی مانگی 10ی ساڵی پارمان پێنەدراوە، لەكاتێكدا هیچ دۆسییەیەكمان كێشەی تێدا نەبووە.

راشیانگەیاند: بەگوێرەی ئەو خشتەیەی وەزارەتی دارایی بڵاویكردووەتەوە، كەمئەندامانی سەنگەر تەنها مووچەی مانگی یەكی ئەمساڵیان پێدەدرێت، لەكاتێكدا مووچەی مانگی 10ی 2025 ی كەمئەندامانی سەنگەر وەك سەرجەم وەزارەتەكانی دیكە لەلایەن عیراقەوە نێردراوەو لەوەزارەتی دارایی هەرێم راگیراوە.

ئاماژەیان بەوەشكرد: تا ناوەڕ‌استی هەفتەی داهاتوو مۆڵەت دەدەینە وەزیرو وەزارەتی دارایی هەرێم، بۆئەوەی بەپەلە مووچەی مانگی 10ی ساڵی رابردوومان بۆ ببەستێت، بەپێچەوانەوە دواتر هەڵوێستمان دەبێت و ئامادەشنین مووچەی مانگی یەك وەربگرین.

كۆمەڵەی كەمئەندامانی سەنگەر راشیانگەیاند: حكومەتی هەرێم لەسەر خوێنی ئێمە دروستبووەو دەبوایە لەبری ئەوەی مووچەكانمان رابگرێت و دەست بۆ قوتی منداڵەكانمان بەرێت، یاسای ژمارە 34 ی خانەنشینی جێبەجێ بكردایە، بۆیە روو دەكەینە وەزیری دارایی و دەپرسین بە چ هۆكارێك دەستی بۆ قوتی منداڵ و گیرفانی كەمئەندامانی سەنگەر بردووە؟.

لەكۆی چوار هەزار و 128 كەمئەندامی سەنگەر، سێ هەزار و 528 دۆسییەی خانەنشینی كەمئەندامی سەنگەر تەواو كراون و دۆسییەكانیان ئاڕاستەی وەزارەتی دارایی كراوە، بەڵام بەهۆی تەواونەكردنی رێكاری گواستنەوەی مووچەكانیان لەوەزارەتی پێشمەرگەوە بۆسەر وەزارەتی دارایی، مووچەكانیان راگیراوە.

PUKMEDIA