کۆمسیۆن بەردەوامە لەخەرجکردنی پارەی کارمەندانی سەر سندوق

PUKMEDIA

لۆگۆی کۆمسیۆن

کۆمسیۆنی باڵای سەربەخۆی هەڵبژاردنەکانی عیراق لە رۆژی  سێشەممەی ڕابردوو ١٠ / ٢ / ٢٠٢٦ـەوە دەستیکردوە بە پرۆسەی خەرجکردنی پاداشتی فەرمانبەرانی سەر سندوقەکانی دەنگدان لە چەند پارێزگایەک و هەتا ئێستاش بەردەوامە.

جومانە غەلای، وتەبێژی کۆمسیۆنی باڵای سەربەخۆی هەڵبژاردنەکان، لە راگەیەندراوێکدا کە وێنەیەکی دەست PUKMEDIA کەوتوە رایگەیاند: "ئیدارەی هەڵبژاردن لە رێگەی فەرمانگەی کارگێڕی و دارایی کۆمسیۆنەوە، پارەی پاداشتی فەرمانبەرانی دەنگدانی لە سێ پارێزگا خستووەتە سەر کارتەکانیان (ماستەر کارت)، کە بریتین لە پارێزگاکانی بەسرە، دهۆک، و میسان."

ئاماژەی بەوەش کردووە کە پاداشتەکان بەسەر ٤١ ناوەندی تۆمارکردن لە پارێزگاکانی میسان و دهۆک، و ٧٦ ناوەندی تۆمارکردن لە پارێزگای بەسرە دابەشکراون.

هەروەها وتیشی: کۆمسیۆن بەردەوامە لە هەماهەنگی لەگەڵ بانکی رافیدەین بۆ تەواوکردنی دابەشکردنی کارتەکانی ماستەر کارت بەسەر نووسینگەی پارێزگاکاندا، کە رێژەی دابەشکردنیان گەیشتووەتە ٩٠٪، و دواتر کۆمسیۆن بەپێی ریزبەندی پارەکە دەخاتە سەر کارتەکانیان.

لە لایەکی دیکەوە، سۆران کاکل، جێگری بەڕێوەبەری بنکەی سێیەمی کۆمسیۆن لە خورماتوو بە PUKMEDIA ی راگەیاند: پرۆسەکە لەو چوارچێوەیەدا دەبێت کە کۆمسیۆن پەیڕەوی دەکات، ئەویش خەرجکردنی ١٥٠ هەزار دینار بۆ هەر کەسێک کە فەرمانبەری دەوڵەت بێت لەگەڵ پێدانی سوپاس و پێزانین، و بڕی ٢٥٠ هەزار دینار بۆ دەرچووانی ئامادەیی و سەرووتر کە فەرمانبەری حکومی نین.

PUKMEDIA